Memleket basshysy Qasym-Jomart Toqaev Qazaqstan halqyna Joldaýynda pandemiiadan keiingi kezeńde Qazaqstannyń odan ári ekonomikalyq damýynyń naqty maqsattaryn qoidy. Bundai pikirdi QR Parlamenti Senatynyń depýtaty Olga Býlavkina bildirdi, dep habarlaidy QazAqparat.
Depýtattyń aitýynsha, memleket ózine alǵan mindettemelerdiń oryndalýyn qamtamasyz etý qajet. Zań shyǵarýshy jáne atqarýshy bilik pandemiiaǵa bailanysty qiyn ýaqytta azamattardyń múddesi úshin jumys isteýi kerek, halyq pen kásipkerlerge qoldaý kórsetýi kerek.
«Bul rette «Biznestiń jol kartasy 2025» biznesti qoldaý men damytýdyń memlekettik baǵdarlamasyn, «Qarapaiym zattar ekonomikasy» jeńildikpen kredit berý baǵdarlamasyn uzartý mańyzdy qural bolyp tabylady», - dedi spiker.
Senat depýtatynyń aitýynsha, infliatsiianyń joǵary deńgeii, baǵanyń negizsiz ósýi qazaqstandyq kásiporyndardyń damý áleýeti men básekege qabilettiligin shekteidi, ulttyq ekonomikanyń osaldyǵyna alyp keledi. Osyǵan bailanysty Prezident infliatsiiany 4-6% dálizine qaitarýdy tapsyrdy.
Al agroónerkásiptik keshendi sýbsidiialaý problemalary aýyl sharýashylyǵy salasynda sybailas jemqorlyq táýekelderine alyp keledi.
«Sýbsidiialardyń qoljetimsizdigi, qarajatpen tolyq kólemde qamtamasyz etilmeýi, bopsalaý, aqparattyq júieler jumysyndaǵy turaqsyzdyq zańnamanyń buzylýyna ákep soǵady. Parlament múddeli memlekettik organdarmen birlesip, qysqa merzimde sýbsidiialaý saiasatynyń zańnamalyq negizin nyǵaitý týraly zań jobasyn ázirleidi», - dep málimdedi Olga Býlavkina.
«Biznesti yntalandyrý, jalaqyny kóterý, biryńǵai turǵyn úi baǵdarlamasyn ázirleý, ekologiialyq máselelerdi sheshý - osy sharalardyń barlyǵy halqymyzdyń ál-aýqatyn arttyrýǵa baǵyttalǵan strategiialyq maqsattarǵa qol jetkizýge baǵyttalatyn bolady», - dep atap ótti senator.
