Foto: Aqorda
Memleket basshysy Qasym-Jomart Toqaev Eńbek jáne halyqty áleýmettik qorǵaý ministri Asqarbek Ertaevty qabyldady, dep habarlaidy Ult.kz.
Prezidentke vedomstvonyń biylǵy negizgi jumys baǵyttary jóninde baiandaldy.
Kezdesý barysynda Asqarbek Ertaev halyqty jumyspen qamtý jospary týraly málimet berdi. Ministrlik ýaqytsha sharalardan góri turaqty ári sapaly jumys oryndaryn ashýǵa, eńbek utqyrlyǵyn arttyrýǵa jáne bilim berý júiesi men eńbek naryǵy arasyndaǵy bailanysty kúsheitýge basymdyq bermek. Ásirese jastardy, sonyń ishinde NEET sanatyndaǵy azamattardy jumyspen qamtýǵa erekshe mán beriletini aityldy.
Sondai-aq ataýly áleýmettik kómek júiesin odan ári jetildirý josparlary tanystyryldy. Bul baǵytta tsifrlyq baǵalaý quraldary arqyly áleýmettik qoldaýdyń naqty muqtaj azamattarǵa jetýin qamtamasyz etý kózdelip otyr. Sonymen qatar eńbekke qabiletti azamattardy mindetti túrde jumyspen qamtýdy kózdeitin áleýmettik kelisimshart tetigin keńeitý josparlanǵan.
Ministr zeinetaqy júiesiniń uzaq merzimdi turaqtylyǵyn qamtamasyz etý jáne zeinetaqy tólemderiniń laiyqty deńgeiin saqtaý máselelerine de toqtaldy. Budan bólek, múgedektigi bar adamdardy áleýmettik qorǵaý sharalary talqylandy. Ministrlik arnaýly áleýmettik qyzmetterdi jan basyna qarai qarjylandyrý tetigin damytýǵa, qyzmet sapasynyń standarttaryn arttyrýǵa, ońaltý qyzmetteri men tehnikalyq quraldardyń qoljetimdiligin keńeitýge nietti. Inkliýzivti jumys oryndaryn ashý máselesine de nazar aýdaryldy.
Kezdesý barysynda kóshi-qon saiasatynyń 2030 jylǵa deiingi tujyrymdamasyn iske asyrý jónindegi is-qimyl jospary týraly aqparat berildi. Bul rette kóshi-qon úderisterin basqarý men boljaýdy jetildirý, ishki migratsiiany teńgerimdi júrgizý jáne eńbek naryǵyn qorǵaý basymdyqtary aiqyndaldy.
Memleket basshysy halyqty jumyspen qamtý, azamattardyń tabysyn arttyrý, áleýmettik qoldaýdyń naqty muqtaj jandarǵa jetýin baqylaýdy kúsheitý, zeinetaqy júiesin jetildirý, teńgerimdi kóshi-qon saiasatyn iske asyrý, áleýmettik qorǵaýda inkliýzivti tásilderdi damytý, sondai-aq tsifrlyq sheshimder arqyly eńbekti qorǵaý júiesin nyǵaitý jáne qaýip-qaterlerdiń aldyn alý boiynsha birqatar naqty tapsyrma berdi.
