Foto: Akorda.kz
Qasym-Jomart Toqaev elordadaǵy jańa emhanaǵa bardy, dep habarlaidy "Ult aqparat" Aqordanyń baspasóz qyzmetine silteme jasap.
«City» emhanasynyń jańa filialy Astananyń qarqyndy damyp kele jatqan aýdanynda ornalasqan. Bul nysanda 30 myńǵa deiin patsient tirkele alady. Sondai-aq munda halyqqa alǵashqy dárigerlik kómekten bastap keshendi diagnostika men konsýltatsiiaǵa deiingi qyzmetter kórsetiledi.
Jobanyń investory, «Olymp Medical Group» JShS bas direktory Erlan Súleimenovtiń aitýynsha, bul City emhanalar jelisiniń úshinshi filialy. Elordanyń Nura jáne Almaty aýdandarynda eki filial jumys istep jatyr. Taǵy da úsh nysan kelesi jyly paidalanýǵa berilmek.
Emhananyń taǵy bir ereksheligi onda mammologiialyq ortalyq ashylady. Naýqastar munda keshendi diagnostikadan ótip, sút bezi aýrýlarynan emdele alady. Meditsinalyq ortalyqta tomosintezi bar tsifrlyq mammografiia, dástúrli jáne vakýýmdyq aspiratsiialyq biopsiia ádisteri, hirýrgke qaterli isikterdi alyp tastaý jolyn kórsetetin lokalizatsiialyq ineler ornatý siiaqty diagnostikalyq tehnologiialar qoldanylady.
Sonymen qatar emhanada barlyq qajetti quraldarmen jabdyqtalǵan ambýlatoriialyq hirýrgiia ortalyǵy ashylmaq.
Astana qalalyq Qoǵamdyq densaýlyq saqtaý basqarmasynyń basshysy Áliia Rústemovanyń aitýynsha, qazirgi ýaqytta elordanyń sol jaǵalaýynda ambýlatoriialyq kómek berý isi kenjelep qalǵan. Qosymsha taǵy 5 emhana ashý kerek. Halyq sanynyń udaiy ósip kele jatqanyn eskersek, meditsinalyq mekemelerge degen qajettilik áli de arta beredi. Bul máseleni sheshýde memlekettik-jekemenshik seriktestik belsendi qoldanylady. Bes jyl ishinde Astana qalasynyń ákimdigi 3 memlekettik emhana salynady jáne 12 jeke emhana ashylady dep josparlap otyr.
