Memleket basshysy elimizdiń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaevtyń tóraǵalyǵymen ótken jiynda el damýynyń jańartylǵan boljamy jáne respýblikalyq biýdjetti naqtylaý jónindegi usynystar talqylandy. Otyrysqa Premer-Ministr Asqar Mamin, Prezident Ákimshiliginiń Basshysy Erlan Qoshanov, Ulttyq bank tóraǵasy Erbolat Dosaev jáne basqalar qatysty.
Otyrys barysynda Úkimet áleýmettik-ekonomikalyq damýǵa qatysty boljamdaryn jáne álemdik ekonomikadaǵy ahýaldy, taýar naryǵyndaǵy úrdisterdi eskere otyryp, osy jylǵa arnalǵan respýblikalyq biýdjetti naqtylaý jónindegi usynystaryn, sondai-aq, biylǵy I toqsannyń aldyn ala qorytyndylaryn usyndy. Atap aitqanda biyl ishki jalpy ónimniń naqty ósimi bekitilgen kórsetkishten 0,3 paiyzǵa artyp, 3,1% deńgeide bolady dep boljanýda. Infliatsiia deńgeii 4-6% aralyǵynda saqtalyp otyr.
Biýdjetti naqtylaýdyń negizgi mindeti – Memleket basshysynyń Joldaýynda aitylǵan tapsyrmalardy oryndaý jáne «Nur Otan» partiiasynyń sailaýaldy platformasyn júzege asyrý. Osyǵan bailanysty biýdjettiń kirisinde de, shyǵysynda da ósim bolady dep kútilýde.
Avtomobil joldaryn damytýǵa, «Aýyl – el besigi» jobasyn odan ári iske asyrýǵa, ekonomikanyń neǵurlym zardap shekken salalaryndaǵy kásipkerlik sýbektilerin qoldaýǵa, «Jumyspen qamtýdyń jol kartasyn» júzege asyrýǵa jáne agroónerkásiptik keshendi damytýǵa qosymsha qarajat bólinetin bolady.
Pandemiiamen kúreske bólinetin qosymsha qarjy dárigerlerge ústemeaqy jáne meditsinalyq qyzmetterdiń aqysyn tóleýge jumsalady. Sonymen qatar áskeri qyzmetshilerdi turǵyn úimen qamtamasyz etýge, sý tasqynyna qarsy is-sharalarǵa, sýmen qamtamasyz etý jáne sý tartý júieleriniń qurylysy men olardy jańǵyrtýǵa qarjy bólý josparlanǵan.
Jiyn qorytyndysy boiynsha Prezident Qasym-Jomart Toqaev biýdjet shyǵyndaryn ońtailandyryp, kirisin arttyrý, memlekettik satyp alý júiesin jetildirý, infraqurylym men tsifrlandyrýdy damytý, sondai-aq, Jekeshelendirýdiń keshendi jospary aiasynda memlekettiń ekonomikadaǵy úlesin azaitý jumystaryn jandandyrý jóninde tapsyrma berdi.
