Sheteldik investorlar keńesiniń otyrysynda Prezident Qasym-Jomart Toqaev tiisti ministrlikterge eksportty qoldaý sharalaryn tsifrlandyrýdy tapsyrdy, dep habarlaidy QazAqparat.
«Kaztrade bazasynda biryńǵai tereze jumys istep tur. Ol 24/7 qaǵidatymen fornt-keńse formatynda qyzmet kórsetedi. Sol arqyly eksporttaýshylar tolyqqandy qoldaý alady. Konsýltatsiialar men daýly máselelerdi sheshý túrinde, ónimdi shetel naryǵyna jyljytý shyǵyndaryn qaitarý boiynsha naqty kómek alyp otyr. Jalpy alǵanda, eksporttaýdy qoldaý maqsatyna shamamen 1 mlrd 200 mln dollar baǵyttaldy. Bir sózben aitqanda bizdiń eksporttaýshylar institýtsionaldyq turǵyda da, qarjylyq turǵyda da qoldaýmen qamtamasyz etilgen», - degen Memleket basshysy eksporttaýshylardy qoldaýda Keńes múshelerinen túsip jatqan usynystarǵa da nazar aýdarý kerektigin aitty.
«Aziia damý bankiniń eksportty qoldaý arhitektýrasyna reforma jasaý týraly usynysy nazar aýdarýǵa turarlyq. Tsifrlyq transformatsiia birinshi kezek t e shaǵyn jáne orta biznes úshin saýda shyǵyndaryn azaitatynymen kelisýge bolady. Saýda jáne integratsiia ministrligi men Tsifrlyq damý, innovatsiialar jáne aeroǵarysh ónerkásibi ministrligine Aziia damý bankimen birlesip eksporttyq qoldaýdy tsifrlandyrý boiynsha naqty sharalar ázirleýdi tapsyramyn», - dedi Qasym-Jomart Toqaev.
Prezident eksporttyq kreditterdi sýbsidiialaý quraly álemde keńinen qoldanylyp otyrǵanmen, bizdiń elde áli paidalanylmai jatqanyn eske saldy.
«Jýyq arada eksporttyq kreditterdi sýbsidiialaý quralyn eksportty qoldaý tetikteriniń qataryna qosý kerek. Eksportty qoldaýǵa arnalǵan Kazexport biryńǵai operatoryna durys retteý rejimin engizý mańyzdy. Sondai-aq, aqshanyń eksporttaýshylarǵa jedel, artyq biýrokratiiasyz jetýi, biraq olardyń qarjyny aqylmen jumsap, esep berip otyrýy mańyzdy», - dedi Memleket basshysy.
