32 aýdandyq aýrýhana kópbeiindi meditsinalyq mekemege ainalady. Bul týraly Úkimettiń keńeitilgen otyrysynda Prezident Qasym-Jomart Toqaev aitty, dep habarlaidy QazAqparat.
«Meniń tapsyrmammen Prezident Ákimshiligi «Qolaily mektep» jáne «Aýyldyq densaýlyq saqtaýdy jańǵyrtý» eki ilki ulttyq jobalaryn ázirleýdi úilestiredi. Olardyń naqty mindeti jáne júzege asyrylý merzimi bar, naqty nátijelerge baǵyttalǵan. Ne jaiynda ekendigin eske sala keteiin. «Qolaily mektep» ulttyq jobasy zamanaýi qural-jabdyqtarmen qamtylǵan, jańa qurylys standarttary boiynsha shamamen 840 myń oqýshy orny qurylysyn kózdeidi», - dedi Memleket basshysy.
Qasym-Jomart Toqaevtyń aitýynsha, «Aýyldyq densaýlyqty jańǵyrtý» ulttyq jobasy barlyq aýyldy qajetti meditsinalyq infraqurylymmen qamtamasyz etýge múmkindik beredi. Ol 800 myńnan astam adam turatyn 650 eldi mekendi qamtidy. 32 aýdandyq aýrýhanany kópbeiindi meditsinalyq mekeme deńgeiine deiin jańartý josparlanǵan.
«Nátijesinde shuǵyl jáne ortasha tehnologiialyq meditsinalyq kómek alý úshin araqashyqtyq 500-den 200 shaqyrymǵa deiin qysqarady. Úkimet biýdjettik protsess aiasynda osy jyldyń qyrkúiegine deiin barlyq esebin júrgizýi jáne atalǵan ulttyq jobalardy júzege asyrý úshin qajetti sharalar qabyldaýy qajet», - dedi Prezident.
