Prezident Qasym-Jomart Toqaev belgili aitysker aqyn Hansha Raisovanyń otbasy men jaqyn týystaryna kóńil aitty, dep habarlaidy "Ult aqparat" Prezidenttiń baspasóz hatshysy Berik Ýálige silteme jasap.
Memleket basshysy Qasym-Jomart Toqaev kórnekti mádeniet qairatkeri, respýblikalyq aqyndar aitysynyń birneshe dúrkin júldegeri, Almaty oblysynyń qurmetti azamaty Hansha Musabaiqyzy Raisovanyń dúnieden ótýine bailanysty kóńil aitý jedelhatyn joldady.
«Hansha Musabaiqyzy 1980-1990 jyldary aitys óneri qaita jandanǵan tusta jarq etip kóringen aqyndardyń biri edi. Ol mádeni qundylyqtarymyzdy jáne rýhani qazynamyzdy dáriptep, el ishindegi jáne halyqaralyq jyr saiystarynda júldeli oryndardy jeńip aldy. El-jurttyń airyqsha qurmeti men yqylasyna bólendi. IýNESKO syilyǵynyń laýreaty atandy. Jas ónerpazdardy sóz zergeri bolýǵa baýlyp, Jetisý óńirinde aqyndar mektebin qalyptastyrýǵa atsalysty.
Qazaqtyń aitys atty ádebi murasyn órkendetýge mol úles qosqan Hansha Musabaiqyzynyń jarqyn beinesi umytylmaidy. Halqymyz belgili aqynnyń esimin árdaiym ardaq tutady», – dep jazylǵan Prezidenttiń jedelhatynda.
Eske sala ketsek, búgin respýblikalyq aqyndar aitysynyń birneshe dúrkin júldegeri, Almaty oblysynyń qurmetti azamaty Hansha Raisova dúnieden ótken habarlanǵan edi.
Halyqaralyq IýNESKO syilyǵynyń laýreaty, aqyndar mektebiniń ustazy Hansha Musabaiqyzy 1956 jyly 5 qazanda Almaty oblysy Qapal aýdany Qońyr aýylynda dúniege kelgen. 1989 jyldan bastap ártúrli deńgeidegi jyr saiystaryna qatysa bastady. «Qazaq tili» qoǵamy uiymdastyrǵan respýblikalyq aitysta bas júlde (1990), Abaidyń 150 jyldyǵyna arnalǵan halyqaralyq aitysta III oryn (1995) ielengen. QHR-da, Reseide, Ózbekstanda, sondai aq oblys aýqymynda ótken aitystarda birneshe ret arnaýly júldege ie boldy.
