Memleket basshysy "Báiterek" holdinginiń basqarma tóraǵasy Qanat Sharlapaevty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa holdingtiń biylǵy birinshi jartyjyldyqtaǵy qyzmetiniń qorytyndylary men agroónerkásiptik keshendi qoldaý, halyqty turǵyn úimen qamtamasyz etý baǵytynda atqarylyp jatqan jumystar týraly baiandaldy.
Prezidentke berilgen málimetterge sáikes iri biznesti qarjylandyrýǵa 143 milliard teńge, shaǵyn jáne orta bizneske 510 milliard teńge, agroónerkásip keshenine 241,3 milliard teńge jumsalǵan. Holdingtiń qoldaýymen jeke qurylys salýshylar jalpy aýdany 759 myń sharshy metr úidi paidalanýǵa berdi. Jergilikti atqarýshy organdardyń obligatsiialaryn satyp alý arqyly aýdany 56 myń sharshy metr turǵyn úi salynyp, qoldanysqa berildi. Bul rette 39 myń otbasy, sonyń ishinde 7,2 myń kezekte turǵan azamattar jeńildigi bar ipotekamen turǵyn úi satyp aldy.
Memleket basshysynyń tapsyrmalaryn oryndaý aiasynda holding "Jasyl-Damý" AQ qarajaty esebinen otandyq aýyl sharýashylyǵy tehnikasynyń jeńildetilgen lizingi baǵdarlamasyna qatysýǵa ótinishter qabyldai bastady. Jeke turǵyn úi qorynyń jaldaý aqysyn sýbsidiialaý tetigi engizildi.
Odan bólek Qanat Sharlapaev usynǵan aqparatqa sáikes 2022 jyly holdingtiń qoldaý kórsetýimen 2 million sharshy metr turǵyn úi nemese 29,6 myń páter paidalanýǵa beriledi. Jalpy, atalǵan sharalar 250 myń adamnyń turmys jaǵdaiyn jaqsartýǵa múmkindik beredi.
Kezdesý sońynda Qasym-Jomart Toqaev Qanat Sharlapaevqa biznesti damytýdy jaqsartý jáne áleýmettik turǵyn úi saiasatyn jetildirý baǵytynda birqatar naqty tapsyrma berdi.
