Foto: Akorda.kz
Prezident Bayer AG kompaniiasynyń basqarma múshesi Shtefan Olrihpen kezdesti, dep habarlaidy "Ult aqparat" Aqordanyń resmi saityna silteme jasap.
Bayer AG kompaniiasynyń basqarma múshesi, farmatsevtika baǵytynyń basshysy Shtefan Olrihpen kezdesý barysynda densaýlyq saqtaý, ornyqty eginshilik jáne ǵylymi zertteýler salalaryndaǵy yntymaqtastyq perspektivalary talqylandy.
Memleket basshysy Bayer kompaniiasynyń zamanaýi meditsinalyq ónimderine qol jetkizýge, sondai-aq zerthanalar ashýǵa jáne birlesken ǵylymi-zertteý jobalaryn júzege asyrýǵa Qazaqstannyń zor qyzyǵýshylyq tanytyp otyrǵanyna nazar aýdardy.
Bayer AG – densaýlyq saqtaý jáne aýyl sharýashylyǵy salalaryna arnalǵan meditsinalyq-biologiialyq sheshimder ázirleýge mamandanǵan halyqaralyq kontsern.
Qasym-Jomart Toqaev Qazaqstannyń biotehnologiialyq klasterdi damytý jumystaryn belsendi júrgizip jatqanyn atap ótti. Sondai-aq atalǵan baǵyttarda ázirlemeler daiyndap, óndiriske engizý úshin QazBioPharm ulttyq biofarmatsevtikalyq holdingi qurylǵany jóninde aitty.
Sonymen qatar kezdesýde Qazaqstanǵa jańa dárilik zattar ákelý rásimderin jeńildetý úshin naqty sharalar qabyldaý máselesi talqylandy.
Memleket basshysy elimizdiń aýyl sharýashylyǵynda qoldanylatyn tyńaitqyshtar, pestitsidter jáne basqa da biohimiialyq zattar óndirý úshin kásiporyn ashý airyqsha mańyzǵa ie ekenine nazar aýdardy. Prezidenttiń pikirinshe, selektsiia, gendik injeneriia salalaryndaǵy ǵylymi jáne iskerlik bailanystardy damytýǵa mol áleýet bar.
