Foto: Akorda.kz
Prezidenttiń jańa baspasóz hatshysy Nurmuhamed Baiǵaraev densaýlyǵyna bailanysty qyzmetin jalǵastyra almaitynyn málimdedi, - dep habarlaidy "Ult aqparat".
"Qurmetti dostar! Keshe densaýlyǵyma qatysty oqys jaǵdaidan soń (pristýptar) dárigerlerge tekserilýge májbúr boldym. Tolyq tekseristen keiin syrqattyń belgisi baiqaldy. Dárigerler uzaqmerzimdi em-domdy birden bastaýdy, ony turaqty qabyldaýdy jáne bastysy – ushaqpen ushýdy belgili bir ýaqytqa deiin toqtatýdy talap etti.
Meditsinalyq talap qazirgi qyzmetimdi tolyqqandy atqarýǵa kedergisin keltiretini belgili. Sebebi aimaqtarǵa jáne shetelderge is-saparlar turaqty túrde bolady. Bul – jii ushaqpen ushý degen sóz.
Shyny kerek, mundaidy ózim de kútpedim. Jospar basqasha edi. Ótken aptada kirisken qyzmetime bilimimmen, biliktiligimmen daiyn edim. Baspasóz qyzmetin jetildirýge, odan ári ashyq etýge qatysty birneshe ideia, bastamalarym bar edi. Alaida «densaýlyq – birinshi bailyq» dep beker aitpaǵan. Sondyqtan qandai qyzmet bolsa da, eń aldymen, ýaqyt ótkizbei, tolyq emdelip alý qajet dep taptym. Osyǵan orai, Prezident baspasóz hatshysy qyzmetin qazir toqtata turýyma týra keledi.
Basshylyq jaǵdaidy túsindi" - dep jazdy ol óziniń Facebook paraqshasynda.
Sondai-aq ol túsinistik tanytqan barsha azamatqa alǵys aitty.
