Foto: Aqorda
Memleket basshysy Qasym-Jomart Toqaev Bas prokýratýrada ótken jiynda elimizde aýqymdy ózgerister júrip jatqanyn aityp, alda Konstitýtsiialyq reforma júrgizý jáne múlde jańa saiasi júiege qadam basý mindeti turǵanyn málimdedi, dep habarlaidy Ult.kz.
Prezidenttiń aitýynsha, jańa dáýirde barlyq salada tsifrlandyrý men jasandy intellektini keńinen engizý – ýaqyt talaby. Bul rette zań ústemdigi men tártipti qamtamasyz etý memlekettik saiasattyń negizgi qaǵidatyna ainalýy tiis.
Qasym-Jomart Toqaev qoǵam men memleket úshin zań men tártiptiń mańyzy erekshe ekenin atap ótti.
«Qoǵamymyzǵa, jalpy elimizge zań ústemdigi, tártip myqtylyǵy aýadai qajet. Keibir shet elderde bolyp jatqan qazirgi kúrdeli ahýaldy kórip, bul saiasatymyzdyń durystyǵyna kóz jetkizip otyrmyz. Zań men tártip memlekettik saiasatymyzdyń negizgi qaǵidaty retinde qabyldanýy kerek jáne bul qaǵidat jańa Konstitýtsiiamyzǵa mindetti túrde engizilýi tiis», – dedi Prezident.
Memleket basshysy Bas prokýratýranyń bul baǵyttaǵy róli airyqsha ekenin aityp, prokýratýra qyzmetkeri zań buzýshylyqqa beitarap nemese selqos qaraýǵa quqyly emes ekenin qadap aitty.
Sonymen qatar Prezident quqyq qorǵaý júiesindegi tsifrlandyrý úderisiniń birkelki emes ekenine nazar aýdardy. Onyń aitýynsha, ár mekeme tsifrlyq júiesin óz betinshe damytyp, bul jumys júiesiz júrgizilip otyr.
«Birtutas júie joq. Keibir organdar tsifrlyq tásilderdi tiimdi qoldansa, endi biri qyrýar qarjy jumsap, nátije shyǵara almai otyr. Bul – naǵyz jymqyrý», – dedi Qasym-Jomart Toqaev.
Osyǵan bailanysty Memleket basshysy Úkimetke qoldanystaǵy barlyq tsifrlyq sheshimderdi saralap, olardyń tiimdiligin arttyrýdy jáne kúshtik qurylymdarǵa arnalǵan biryńǵai tsifrlyq ekojúie qalyptastyrýdy tapsyrdy.
Prezident azamattardyń derbes derekterin qorǵaý máselesine de arnaiy toqtaldy. Aqparattyq keńistikte jeke derekterdiń taralý faktileri jiilep ketkenin aitqan Qasym-Jomart Toqaev bul baǵytta júieli jumys júrgizý qajet ekenin jetkizdi.
Foto: Aqorda
Sondai-aq Memleket basshysy kiberqylmyspen kúres tásilderin túbegeili qaita qaraý kerektigin málimdedi.
«Álemde kiberqylmys órship barady. Jyl saiyn myńdaǵan azamatymyz internet alaiaqtarynyń qurbany bolyp jatyr. Qazir mundai qylmystardyń tek besten biri ǵana ashylady. Bul – óte tómen kórsetkish», – dedi Prezident.
Qasym-Jomart Toqaev kóshi-qon úderisterin jappai tsifrlandyrýdy da ózekti másele retinde atap ótti. Onyń aitýynsha, Qazaqstan shetel azamattary úshin tranzittik ári turaqtap qalýǵa qolaily elderdiń birine ainalyp otyr.
Prezident Úkimetke Ulttyq qaýipsizdik komitetimen birlesip, elge kelgen shetel azamattaryn ýaqtyly esepke alý men baqylaýǵa arnalǵan tehnikalyq quraldardy jetildirýdi tapsyrdy.
Jiyn barysynda Memleket basshysy destrýktivti kontentti taratý máselesine de toqtaldy. Ol jasandy intellektiniń keibir adamdar tarapynan aqparattyq qarýǵa ainalýy múmkin ekenin aityp, mundai áreketterge quqyqtyq baǵa berý qajettigin jetkizdi.
«Qoǵamdy jikke bólip, óshpendilikke itermeleitin kontentke jol berýge bolmaidy. Azamattarǵa destrýktivti aqparat taratýdyń quqyqtyq saldary jóninde únemi túsindirý jumystaryn júrgizý qajet», – dedi Qasym-Jomart Toqaev.
Sóz sońynda Prezident tártipsizdik pen zańsyzdyqqa jol berilmeitinin atap ótip, otanshyldyq uǵymyn jaýapkershilik pen jasampazdyqpen bailanystyrdy.
«Otanshyldyq – uran emes. Bul – Otanyńa paida ákelý, elińe qyzmet etý», – dedi Memleket basshysy.
