Memleket basshysy Qasym-Jomart Toqaev Úkimettiń keńeitilgen otyrysynda aýyldyq jerlerdi damytý máselesine toqtaldy, - dep habarlaidy "Ult aqparat" Aqordanyń baspasóz qyzmetine silteme jasap.
«Aýyldyq jerlerdi damytý kerek. Men Aýyldyq aýmaqtardy damytý tujyrymdamasyn ázirleýdi tapsyrdym. Bul – meniń jańa prezidenttik ókilettigim bastalǵannan keiingi alǵashqy Jarlyǵym. Kelesi jyl aýyl turǵyndarynyń ál-aýqatyn arttyrýǵa jáne turmys sapasyn jaqsartýǵa arnalady. Tujyrymdamany ázirleýge mamandardy, sharýalardy jáne jergilikti qoǵam belsendilerin tartý qajet.
Aýyldy órkendetýdiń múldem tyń tásilderi kerek. Árine, ol naqty iske asyrylýǵa tiis. Jer – aýyldaǵy turǵyndardyń negizgi tabys kózi. Ókinishke qarai, eldi mekenderdiń tóńireginde jaiylym jetispeidi. Shamamen 8,8 million gektar jer tapshy.
Meniń tapsyrmammen 5,2 million gektarǵa jýyq aýyl sharýashylyǵy jeri memleket menshigine qaitaryldy. Bul – negizinen, jaiylymdyq jerler. Endi Úkimet oblys ákimdikterimen birlesip, jerdi bólip-taratý úshin monitoring kartasyn ázirleýge tiis. Sol arqyly jaiylymdyq jerge muqtaj aýyl halqynyń jaǵdaiyn jasaimyz», - dedi Prezident.
Memleket basshysynyń aitýynsha, «barmaq basty, kóz qysty» degendi múldem doǵarý qajet.
«Ózara ymyralasqan, astyrtyn sheshim qabyldaýǵa bolmaidy. Jekelegen sharýashylyqtardyń emes, aýyl turǵyndarynyń múddesi birinshi orynda turýǵa tiis. Aýyl jurtynyń kópshiliginde jer úlesi bar. Biraq halyq onyń igiligin kóre almai otyr.
Azyq-túlik qaýipsizdigi búkil álem boiynsha basty máselege ainaldy. Biyl bizdiń elde astyq mol shyqty. Biraq eginniń ortasha shyǵymy áli de tómen. Bul salada zamanaýi tehnologiiany qoldaný óte mańyzdy. Sharýalardy osyǵan yntalandyrý kerek.
Sondai-aq tyńaitqyshtyń qoljetimdi bolýyn qamtamasyz etken jón. Aýyl sharýashylyǵy ónimin óńdeý isin jaqsartýǵa basa nazar aýdarý qajet. Memleket jyl saiyn agroónerkásip keshenin damytýǵa 350 milliard teńgeden astam sýbsidiia bóledi. Soǵan qaramastan, tereń óńdeý óndirisi damyp jatqan joq» - dedi ol.
Prezident agroónerkásip keshenin damytýdyń ulttyq jobasyndaǵy josparlar oryndalmai jatqanyn eske saldy.
«Mysaly, aýyl sharýashylyǵy ónimin óńdeýge qatysty 65 jobany júzege asyrý josparlanǵan. Is júzinde onyń 31-i ǵana iske qosyldy. Sol siiaqty 7 qus fabrikasynyń ornyna 3 fabrika salyndy. Balyq óndiretin 11 jobanyń jeteýi ǵana paidalanýǵa berildi.
Biz elimizdi negizgi azyq-túlikpen tolyq qamtamasyz etýimiz kerek. Sondyqtan Úkimet josparlanǵan barlyq jobalardy júzege asyrýǵa mindetti.
Kelesi jyly aýyl sharýashylyǵy kooperatsiiasyn damytý jónindegi aýqymdy jobany bastaimyz. Oǵan 1 trillion teńge bólinedi. Bul joba 1 million aýyl turǵynyn qamtidy» - dedi Qasym-Jomart Toqaev.
Memleket basshysynyń sózinshe, aýyldaǵy áleýmettik salada da ózgerister bolady.
«Aýyldyń densaýlyq saqtaý júiesin jańǵyrtý úshin arnaiy joba qolǵa alynady. Shamamen 700 jańa meditsina nysany salynady. Kóp salaly 32 aýdandyq aýrýhanada jańǵyrtý jumystary júrgiziledi. Osynyń bárine 200 milliard teńgeden astam qarajat bólinedi.
Jalpy, aimaqtarda infraqurylymǵa qatysty máseleler az emes. Turǵyn úi tapshylyǵy, jylý, energiia jáne sý jelileriniń eskirgeni, joldardyń tozyp turǵany barshaǵa málim. Búgingi basqosýǵa oblys ákimderi qatysyp otyr. Jańadan taǵaiyndalǵan basshylar da bar. Sizderge senim artamyz. Ár aimaqty turmys sapasy joǵary «qýatty óńirge» ainaldyrý úshin zor múmkindik berilip otyr. Tabandy jumys isteý qajet» - dep túiindedi Prezident.
