Foto: Aqorda
Prezident Toqaev Ashhabadqa baryp, beibitshilik jáne senim forýmyna qatysýda, dep habarlaidy Ult.kz.
Qazaqstan Prezidenti Qasym-Jomart Toqaev halyqaralyq beibitshilik jáne senim jylyna arnalǵan forýmǵa qatysý úshin Ashhabad qalasyna keldi. Áýejaida Memleket basshysyn Túrikmenstan Halk Maslahatynyń Tóraǵasy Gýrbangýly Berdimuhamedov qarsy aldy.
Qos tarap áýejaida-aq shaǵyn kelissózder júrgizdi. Kezdesý barysynda Toqaev búgingi geosaiasi jaǵdaida forým taqyryptarynyń airyqsha ózekti ekenin atap ótti.
– Bul basqosý jahandyq turaqtylyqqa jáne Ortalyq Aziiadaǵy dostyq pen yntymaqtastyqty nyǵaitýǵa qosylatyn mańyzdy úles bolady, – dedi Qazaqstan Prezidenti.
Toqaev sondai-aq Túrikmenstan Prezidenti Serdar Berdimuhamedovtiń Qazaqstanǵa jasaǵan sońǵy memlekettik saparyna joǵary baǵa berip, sol saparda qol jetkizilgen kelisimderdi iske asyrýdyń mańyzyn aitty.
Gýrbangýly Berdimuhamedov Qazaqstan Prezidentin Túrikmenstannyń turaqty beitaraptyǵynyń 30 jyldyǵyna arnalǵan forýmǵa qatysqany úshin alǵys bildirip, ekijaqty kún tártibindegi negizgi baǵyttarǵa toqtaldy.
Prezident Toqaev Ashhabadta Túrikmenstan Prezidenti Serdar Berdimuhamedovpen de jeke kezdesý ótkizdi. Memleket basshysy baýyrlas eldi beitaraptyqtyń 30 jyldyǵymen quttyqtap, forýmda talqylanatyn beibitshilik, senim jáne beitaraptylyq taqyryptarynyń ýaqyt talabyna sai ekenin atap ótti.
– Qazirgi álemge jetispei turǵan da dál osy qundylyqtar, – dedi Qasym-Jomart Toqaev.
Kelissózder barysynda eki el basshylary saýda kólemin arttyrý, ekonomikalyq bailanystardy keńeitý, energetika, kólik-logistika jáne aýyl sharýashylyǵy salasyndaǵy birlesken jobalardy talqylady.
