Foto: Akorda.kz
Prezident Qasym-Jomart Toqaev Qaraǵandy oblysyndaǵy «ArselorMittal Temirtaý» aktsionerlik qoǵamyna qarasty Kostenko atyndaǵy shahtada bolǵan apat saldaryn joiý jónindegi jedel shtab otyrysyn ótkizdi, - dep habarlaidy "Ult aqparat" Aqordanyń baspasóz qyzmetine silteme jasap.
Eń aldymen, qutqarý jumystarynyń barysy jáne qazirgi ahýal týraly Tótenshe jaǵdailar ministri Syrym Sháriphanov baiandady.
– Apat kezinde shahtada 252 adam bolǵan. 206 qyzmetker óz betinshe kóterildi. Qazirgi ýaqytta apattyq-qutqarý jumystaryna 10 bólimshe, 55 taý-ken qutqarýshy jáne 12 tehnika jumyldyryldy. Jumystar eki óndirý ýchaskesi aýmaǵynda júrgizilýde. Jańa órt oshaqtary baiqalmaidy. Jumys táýlik boiy jalǵasady, – dedi Syrym Sháriphanov.
Memleket basshysy Tótenshe jaǵdailar ministriniń baiandamasyn tyńdap bolǵannan keiin izdestirý-qutqarý jumystaryn barlyq qajetti kúshti tarta otyryp, kúsheitilgen rejimde jalǵastyrýdy tapsyrdy.
– Jańa ǵana azamattar ár 10-15 minýt saiyn aqparat berip turý máselesin kóterdi. Múmkindiginshe qamtamasyz etý kerek. Halyqpen qarym-qatynas jasaityn bir ókil bolsyn. Jurtshylyqty aqparatsyz qaldyrýǵa bolmaidy. Bul – óte shetin ári múldem jol berýge bolmaityn másele. Biz kún-tún demei, sońyna deiin kúresýimiz kerek, – dedi Qasym-Jomart Toqaev.
Munan soń Densaýlyq saqtaý ministri Ajar Ǵiniiat zardap shekken azamattarǵa kórsetilip jatqan meditsinalyq kómek týraly málimet berdi.
– Meditsinalyq kómek jedel ári tolyq kórsetilip jatyr. Ártúrli deńgeide gazdan ýlanǵandar toksikologiia bólimshesinde em alýda. Meditsinalyq kómek kórsetýge barlyq dáriger jumyldyryldy, – dedi Ajar Ǵiniiat.
Sonymen qatar Eńbek jáne halyqty áleýmettik qorǵaý ministri Svetlana Jaqypova qaza tapqan kenshilerdiń otbasylaryna qandai áleýmettik kómek kórsetiletinin aitty.
– Qaza tapqan azamattardyń otbasylaryna asyraýshysynan airylýyna bailanysty járdemaqy taǵaiyndalady. Ol respýblikalyq biýdjetten, áleýmettik saqtandyrý qorynan jáne ómirdi saqtandyrý kompaniiasynan tólenedi. Járdemaqy kóleminiń jalpy ortasha mólsheri asyraýyndaǵy adamdar 18 jasqa tolǵanǵa deiin ai saiyn 400-500 myń teńgeden bastalady. Eger balalar joǵary oqý oryndarynda bilim alyp jatqan bolsa, onda 23 jasqa deiin tólenedi. Ázirge barlyq tólemdi óteý «ArselorMittal Temirtaý» kompaniiasyna júkteledi. Kásiporyn ujymdyq shartqa sáikes jyldyq tólem táýekelderin tóleýge mindetti. «ArselorMittal Temirtaý» kompaniiasy jerleý rásimderine bailanysty barlyq shyǵyndy, sondai-aq balalardy joǵary oqý oryndarynda oqytýdy óz moinyna alýǵa tiis, – dedi Svetlana Jaqypova.
Premer-Ministr Álihan Smaiylov Úkimet «ArselorMittal Temirtaý» kompaniiasynyń aktsionerlerimen aldyn ala ýaǵdalastyqqa qol jetkizgenin jáne kásiporynǵa tiesili menshik quqyǵyn Qazaqstan Respýblikasynyń paidasyna berý jónindegi mámileni resimdeý protsesi aiaqtalýǵa jaqyn ekenin baiandady.
Úkimettik komissiia músheleriniń baiandamalaryn tyńdaǵan Prezident apatty joiý jáne kenshilerdi qutqarý úshin barlyq sharany qabyldaýdy, sondai-aq qaza tapqan jáne zardap shekken azamattardyń otbasylaryna jan-jaqty kómek kórsetý jóninde tapsyrma berdi.
– Sizderdiń mindetterińiz – adamdarmen tikelei jumys isteý, kezdesý, sondai-aq jedel topty qajetti qural-jabdyqtarmen qamtamasyz etý. Biz qazir qalyptasqan jaǵdaidy túsindirý, eń bastysy, sheshim qabyldaý úshin jumyla jumys isteýimiz kerek. Jergilikti ákimdik tiisti sheshim qabyldaýy qajet. Kásiporynnyń suranystaryna súiene otyryp, qajetti nárseniń bárin anyqtańyzdar. Úkimettik komissiia barlyq máseleni pysyqtaýǵa tiis. Men ne isteý kerek ekenin aittym. Árkim ózine qatysty jumysty biledi. Ministrler, basshylar ózderiniń jumys tásilderin bilýi kerek. Prezident ár oqiǵa saiyn kelip, tapsyrma beredi dep kútip otyrýǵa bolmaidy. Vadim Borisovich Basinge kásiporyndy basqarýdy óz qolyna alýdy tapsyramyn. Úkimet pen ákimdikke jan-jaqty tiisti kómek kórsetýdi, Tótenshe jaǵdailar ministrligine múddeli qurylymdarmen birlesip, apat saldaryn joiý jáne kenshilerdi qutqarý úshin barlyq sharalardy qabyldaýdy tapsyramyn. Ishki ister ministrligi zardap shekken adamdardyń otbasylarymen jumys isteýi kerek. Úkimettik komissiiaǵa azamattardyń qaza bolýyna ákep soqtyrǵan órttiń mán-jaiyn tergeýdi, barlyq kinálilerdi jaýapqa tartýdy tapsyramyn, – dedi Memleket basshysy.
