Foto: Akorda.kz
Prezident «Almaty qalasynyń kólik holdingi» JShS basqaratyn ONAY elektrondy bilet satý júiesimen jáne Almaty qalasyndaǵy qoǵamdyq kólikterdi dispetcherlik basqarý ortalyǵynyń jumysymen tanysty, dep habarlaidy "Ult aqparat" Aqordanyń resmi saityna silteme jasap.
Memleket basshysyna qoǵamdyq kólikterde elektrondy tólem júiesin engizý jáne búkil úderisti avtomattandyrý nátijesinde jolaýshy tasymaly salasynda kóleńkeli aqsha ainalymy aitarlyqtai azaiyp, kólik kásiporyndarynyń tabysy birneshe ese artqany jóninde baiandaldy.
2016-2022 jyldary atalǵan salanyń jyldyq qarjy ainalymy 2,7 ese, iaǵni 10 milliard teńgeden 26,8 milliard teńgege deiin ósti. Osy jyldary qoǵamdyq kólikterdiń sany men sapasy artty. Sonymen qatar qoǵamdyq kólikterdiń ýaqyt tártibin saqtaýy 95 paiyzǵa deiin jetken.
Prezident damyǵan qoǵamdyq kólik júiesi sapaly qala tirshiliginiń ajyramas bóligi ekenin atap ótti. Qasym-Jomart Toqaev osy salany odan ári reformalaýdyń mańyzdylyǵyna, jolaýshylar tasymalynyń sapasy men jailylyǵyn únemi jetildirý qajettiligine nazar aýdardy.
Kompaniia basshylyǵynyń aitýynsha, Almaty men onyń mańyndaǵy aýmaqtardaǵy adamdardyń kelip-ketýine júrgizilgen taldaý nátijesinde tiimdi kólik júiesi qalyptasady. Onyń derekteri baǵdarlyq jelini ońtailandyrý kezinde eskeriledi.
«Almaty qalasynyń kólik holdingi» JShS qoǵamdyq kólikti basqarý salasyndaǵy tájiribesin basqa baǵyttarda da belsendi qoldanady. Atap aitqanda, kompaniia 15 sanat boiynsha jeńildikpen jol júrýge quqyǵy bar azamattardyń áleýmettik sanattaryn, sonyń ishinde olardyń júrip-turý baǵyttaryn tolyq tsifrlandyrdy. Qazirgi ýaqytta osy derekter negizinde ataýly áleýmettik kómektiń maqsatty túrde jumsalýyn qamtamasyz etý úshin jobalar ázirlenip jatyr. Budan bólek, kompaniianyń dispetcherlik basqarý ortalyǵy invataksi mashinalary men kommýnaldyq arnaýly tehnikalardyń qozǵalysyna monitoring júrgizedi.
