Qasym-Jomart Toqaev Almaty oblysyndaǵy «Mareven Fýd Tian-Shan» kásipornyna bardy, dep habarlaidy "Ult aqparat" Aqordaǵa silteme jasap.
Memleket basshysyna kásiporynnyń múmkindikteri týraly málimet berildi. Kompaniia basshylyǵynyń málimetine sáikes 4,5 gektar aýmaqty alyp jatqan kásiporynǵa 30 milliard teńge investitsiia salynǵan. Kompaniia Japoniia, Shveitsariia jáne Germaniiadan ákelingen innovatsiialyq qurylǵylarmen tez daiyndalatyn azyq-túlik ónimderin shyǵarady. Jylyna 85 myń tonna ónim shyǵarýǵa múmkindigi bar.
Qazirgi ýaqytta kásiporyn 500 million qaptama shyǵarsa, sonyń 70 paiyzy eksporttalady.
«Mareven Fýd Tian-Shan» JShS 670 adamdy jumyspen qamtyp otyr. Onyń 95 paiyzy jaqyn mańdaǵy eldi mekenderdiń turǵyndary.
Budan keiin Qasym-Jomart Toqaevqa oblys ákimi Amandyq Batalov óńirdegi júzege asyrylyp jatqan investitsiialyq jobalar men oblystyń áleýmettik-ekonomikalyq damýy týraly esep berdi.
Oblys ákiminiń aitýynsha, aimaq ekonomikasyna 312 milliard teńge investitsiia tartylyp, 40 myń jumys orny ashylǵan. Biyl óńirde jalpy quny 112 milliard teńge bolatyn 65 joba iske asyrylyp jatyr.
Amandyq Batalov Prezidenttiń byltyrǵy Germaniiaǵa jasaǵan saparynyń nátijesinde «Baýmann» kompaniiasy usaq mal etin óńdeitin qýaty 30 myń tonnalyq «Jetisý qoi» jobasyn qolǵa alǵanyn habarlady.
Qasym-Jomart Toqaev oblysta atqarylyp jatqan investitsiialyq jobalarǵa oń baǵa berip, bastalǵan jumystardy ýaqtyly aiaqtaýǵa tapsyrma berdi.
