Memleket basshysy Qasym-Jomart Toqaev Almaty oblysy men Almaty qalasy ákimderiniń esebin tyńdady. Bul týraly Prezidenttiń baspasóz hatshysy málim etti, dep habarlaidy "Ult aqparat".
Prezidentke Almaty oblysynyń biylǵy birinshi jartyjyldyqtaǵy áleýmettik-ekonomikalyq damýy jóninde telefon arqyly baiandaldy.
Amandyq Batalovtyń aitýynsha, negizgi salalardyń barlyǵynda ósim qamtamasyz etilip, qysqa merzimdi ekonomika kórsetkishi 109,4 paiyz bolǵan.
Qasym-Jomart Toqaevqa aimaqtaǵy epidemiologiialyq jaǵdai týraly málimet berildi. Oblys ákimi sońǵy apta ishinde koronavirýs indetin juqtyrǵandardyń sany 1 paiyzdan aspaǵanyn jetkizdi. Óńirde 4 myń tósek-oryn qarastyrylǵan. Juqpaly indet statsionarynyń 55,8 paiyzynda, jansaqtaý bólimderindegi oryndardyń 13 paiyzynda naýqastar em qabyldap jatyr.
Memleket basshysy sonymen qatar, turǵyndardy aýyz sýmen qamtamasyz etý týraly málimet aldy. Ákim oblysta ortalyqtanǵan sýmen qamtý 98,3 paiyz bolǵanyn jáne bul elimiz boiynsha eń joǵarǵy kórsetkishterdiń biri ekenin aitty. Biyl 7 aýylǵa sý qubyryn tartyp, 11 eldi mekendi taza aýyz sýmen qamtý arqyly kórsetkishti 99,5 paiyzǵa jetkizý josparlanyp otyr. Bul jobaǵa 10,9 milliard teńge qarjy qarastyrylǵan. Aldaǵy bes jyldyń ishinde taǵy 33 aýyl aýyz sýmen qamtamasyz etilip, 72 eldi mekende jelilerdi qaita qalpyna keltirý jumystary júrgiziledi.
Prezidentke Amandyq Batalov Úsharal qalasyndaǵy áýejaidyń ushyp-qoný jolaǵyn jóndeý jumysynyń, Alakól jaǵalaýyndaǵy sý tazartý qurylǵylary qurylysynyń bastalǵanyn jáne aýyl ákimderi sailaýynyń qorytyndysy týraly aitty.
Qasym-Jomart Toqaev buqaralyq sportty damytýǵa jáne ishki týrizmdi ilgeriletýge erekshe kóńil bólýdi tapsyrdy.
Budan keiin Memleket basshysy Almaty qalasynyń ákimi Baqytjan Saǵyntaevpen shahardaǵy koronavirýs indetiniń taralýyna qarsy atqarylyp jatqan sharalar men qalanyń infraqurylymyn damytý máselelerin telefon arqyly talqylady.
Baqytjan Saǵyntaevtyń aitýynsha, «delta» shtamynyń taralýyna bailanysty Almaty qalasyndaǵy epidemiologiialyq jaǵdai kúrdeli bolyp tur. Ótken aptada indet juqtyrý 1,4 ese artyp, 7 936-dan 10 805-ke jetken. Bir táýlikte virýs juqtyrý 1,4 paiyzǵa kóbeigen. Sońǵy táýlikte jańadan 1558 naýqas tirkelse, olardyń 1480-inde indettiń belgileri bar.
Naýqastar sanynyń artýyna bailanysty qosymsha juqpaly aýrýlar aýrýhanalary ashylýda. Qazir 7625 naýqas em qabyldap jatyr, 2400 oryndyq tósek-oryn qory jasaqtaldy.
Qalanyń dárihana jelisin dári-dármekpen qamtamasyz etý maqsatynda 5 milliard teńge kóleminde turaqtandyrý qory quryldy. 68 túrli dári-dármektiń qajetti mólsheri jasaqtaldy. Qalanyń meditsinalyq uiymdary dári-dármek pen jeke qorǵanysh quraldarynyń eki ailyq qorymen qamtamasyz etilgen.
Turǵyndarǵa jappai ekpe salý jalǵasyp jatyr. Qalada 167 vaktsina salý pýnkti jumys istep tur. 4 tamyzdaǵy jaǵdai boiynsha 740 487 adamǵa ekpeniń birinshi komponenti, 545 954 turǵynǵa ekinshi komponenti salynǵan.
Memleket basshysy Almaty qalasynyń ákimine koronavirýs indetiniń taralýyna jol bermeý boiynsha jumysty kúsheitýdi jáne shekteý sharalarynyń saqtalýyn qatań baqylaýǵa alý jóninde tapsyrma berdi.
Áńgimelesý barysynda Baqytjan Saǵyntaev Qasym-Jomart Toqaevqa Naýryzbai aýdanyna qosylǵan yqsham aýdandardaǵy turǵyndardy sapaly aýyz sýmen qamtamasyz etý jáne Abai dańǵylyn qala shekarasyna deiin uzartý jóninde baiandady. Sonymen qatar qalanyń tarihi ortalyǵyndaǵy qurylystardy shekteý máseleleri kóterildi.
