Marat Sultanǵazievtiń aitýynsha, qazirgi kezeńde oblystyń ekonomikasynda oń ózgerister baiqalady. Atap aitqanda, aýyl sharýashylyǵy salasynyń damý kórsetkishi - 102,8, óńdeý ónerkásibiniń ósimi - 105,2, saýda - 103, qurylys -114,3 paiyzǵa artqan. Oblys ákimdigi jyl sońyna deiin osy qarqyndy saqtap qalýǵa nietti.
Prezident azamattardyń senimin aqtaý, sondai-aq oblys turǵyndarynyń turmys sapasyn jaqsartý úshin naqty sharalar qabyldaý mańyzdy ekenin aitty.
Memleket basshysyna ákimshilik-aýmaqtyq reformalardan keiingi jańa múmkindikterdi eskere otyryp, Almaty oblysy men Qonaev qalasynyń áleýmettik-ekonomikalyq damý josparyna ózgerister engiziletini jóninde aqparat berildi. Ákimniń aitýynsha, qurylys, ónerkásip, aýyl sharýashylyǵy, óńdeý ónerkásibi, saýda jáne týrizm siiaqty ekonomikanyń investitsiialyq tartymdy sektorlaryna erekshe kóńil bólinedi.
Marat Sultanǵaziev Qasym-Jomart Toqaevqa oblys ortalyǵyn Qonaev qalasyna kóshirý jumystary jóninde baiandady. Sondai-aq jergilikti atqarýshy organdar men memlekettik mekeme qyzmetkerleri úshin qajetti jaǵdai jasaýǵa baǵyttalǵan keshendi sharalar jóninde esep berildi.
Prezident jańa ákimge oblys turǵyndarynyń turmys sapasyn arttyrýǵa, turǵyn úi-kommýnaldyq sharýashylyǵyna, úsh aýysymdyq mektepterge, irrigatsiialyq júielerdi jańartýǵa, meditsina jáne qoǵamdyq kólik máselelerin sheshýge qatysty birqatar mindet júktedi.
