Foto: Aqorda
Qasym-Jomart Toqaev Astana halyqaralyq forýmynyń plenarlyq otyrysynda jahandaǵy qarýly qaqtyǵystardyń ekonomikalyq jáne adamgershilik saldary týraly pikir bildirdi, dep habarlaidy Ult.kz.
Prezidenttiń aitýynsha, 2022 jylǵy derekter boiynsha, álemde 52 memleket soǵys jaǵdaiynda turdy. Bul qaqtyǵystardyń ekonomikalyq shyǵyny 19 trillion dollardy qurap, álemdik ishki jalpy ónimniń 13,5 paiyzyna teń bolǵan.
«Osyndai qaqtyǵystar anaǵurlym uzaq ári kúrdeli sipatqa ie. Oǵan kóptegen toptar, onyń ishinde memlekettermen bailanysy joq uiymdar aralasady. Bul beibitshilik ornatýǵa kedergi keltirýde», – dedi Prezident.
Iadrolyq qarýǵa qatysty máseleler de erekshe alańdaýshylyq týǵyzýda. Qazirgi tańda toǵyz eldiń arsenalynda 13 myń iadrolyq oqtumsyq bar, jáne olardyń qoldaný yqtimaldyǵy artyp keledi. Bir ǵana iadrolyq jarylystyń jahandyq klimat apatyna ákelýi múmkin ekenin ǵalymdar eskertedi.
Prezident Qazaqstannyń iadrolyq qarýsyzdaný jolyndaǵy bastamalaryn atap ótip, eldiń beibitshilikti saqtaýǵa baǵyttalǵan ustanymyn taǵy bir márte aiqyndady:
«Biz Keńes ókimetinen qalǵan iadrolyq arsenaldan óz erkimizben bas tarttyq. Qazirgi tańda iadrolyq jáne biologiialyq qarýdy taratpaý saiasatyn ustanamyz».
Sonymen qatar, Toqaev jahandyq qaýipsizdik máselesine geosaiasi turǵydan ǵana qaramai, yntymaqtastyq pen kópjaqtylyqty saqtaý mańyzdy ekenin aitty. Qazaqstannyń syrtqy saiasaty barlyq elderdiń egemendigin qurmetteý jáne dialogqa ashyqtyq qaǵidattaryna negizdelgen.
Prezident sózin: «Birligimiz – áralýandyqta» qaǵidatyn ustaný arqyly ǵana biz órkenietti qoǵam qura alamyz», – dep túiindedi.
