Búgin oblys ákimi Arhimed Muhambetov Qostanai qalasynda jańadan boi kótergen № 28 mektep-gimnaziiasyna bardy. Bul týraly óńir basshysy Instagram-paraqshasynda jazdy, dep habarlaidy "Ult aqparat".
Memlekettik tilde oqytatyn 900 oryndyq mektep, osy jyldyń 4 qarashasynda ashylady. Aita ketsek, bul jerde buryn kolledj ǵimaraty bolǵan. Endi ol Qostanai oblysy ákimdigi bilim bóliminiń teńgerimine berildi.
«Mektepti jóndeýge jáne jaraqtandyrýǵa 250 mln teńgeden astam qarajat bólindi: jergilikti biýdjetten - 160 mln teńge jáne demeýshilik qarajat – 94,7 mln teńge. Jalpy, ǵimarattyń shatyryn, jylytý jáne sýmen jabdyqtaý júielerin, 3 qabatty jóndeýge, sondai-aq qasbet boiynsha jumystarǵa 200 mln teńge jumsaldy. Al qazirgi zamanǵy jabdyqtarmen jaraqtandyrýǵa 60 mln teńge baǵyttaldy. Mektepti belgilengen merzimde ashýdy tapsyrdym», - dep jazdy Arhimed Muhambetov.
Búgingi kúni himiia, fizika, biologiia jáne robototehnika kabinetteri tolyq jóndelgen. Sonymen qatar ashanalyq, mýzykalyq jáne sport jabdyqtary, synyptarda jańa jihazdar ornatyldy.
Aita keteiik, Memleket basshysy Qasym-Jomart Toqaev biylǵy shilde aiynda Qostanaida qazaq tilinde bilim beretin jalǵyz bastaýysh mektebiniń kúrdeli jaǵdaiyna alańdaýshylyq bildirgen bolatyn.
«Jergilikti turǵyndardyń pikirine qaraǵanda, Qostanaidaǵy qazaq tilinde bilim beretin mektepke qatysty kúrdeli jaǵdai qalyptasyp otyr. Bilim ministri jáne oblys ákimi barlyq máseleni jańa oqý jylyna deiin sheshýi tiis», - dep jazǵan bolatyn Prezident Twitter-degi paraqshasynda.
Keiin osy máselege qatysty oblystyq Óńirlik kommýnikatsiialar qyzmetinde qala ákimi Qairat Ahmetovtiń qatysýymen brifing ótti.
«Internette shyndyqqa sáikes kelmeitin málimetter tarap jatyr. Negizi, másele jańa qazaq mektebin kóshirýden bastaldy. Bul jerde shý kóterip otyrǵan jurtshylyq durys túsinbegen. Biz mektepti jabý emes, ony basqa mekenjaiǵa kóshirý týraly usynys aittyq. Iaǵni, bastaýysh mektepti Jeńis-Borodin kósheleri qiylysynda ornalasqan kolledjge kóshirý týraly bastama kóterildi. Ata-analardyń pikiri eskerilip, bastaýysh mektep óz ornynda qalatyn boldy. Sondyqtan, BAQ ókilderine resmi aqparatty ǵana taratýdy suraimyz», - degen edi Qairat Ahmetov.
