QR Prezidenti Ákimshiliginiń qoǵamdyq qabyldaýy Telegram-kanalyn ashty, dep habarlaidy "Ult aqparat".
Qoǵamdyq qabyldaýdyń kanaly t.me/priemnaya_ap siltemesi arqyly qoljetimdi. Oǵan «Join» («Qosylý») túimeshesin basý arqyly jazyla alasyz. Qazirdiń ózinde qoǵamdyq qabyldaý kanalyna 400-den astam adam jazylyp úlgergen.
Aita keterligi, Qazaqstan Respýblikasy Prezidenti Ákimshiliginiń Ótinishterdi qaraýdy baqylaý bóliminiń meńgerýshisi qyzmetin Aida Balaeva atqarady. Jańa qyzmetine kirisken alǵashqy úsh aptada ol 100-den astam adamdy jeke qabyldady. Sodan keiin óńirlerge de saparlap, Qaraǵandy, Soltústik Qazaqstan oblystarynyń turǵyndarymen júzdesken edi.
QR Prezidenti Ákimshiliginiń Ótinishterdi qaraýdy baqylaý bólimi qurylǵan sátten beri jazbasha jáne e-gov portaly, Prezidenttiń virtýaldy qabyldaýy arqyly 4 myńǵa jýyq ótinish kelip túsken. Munan bólek, bólim Nur-Sultan qalasynda, Qaraǵandy, Atyraý jáne Soltústik Qazaqstan oblystarynda azamattardy kóshpeli qabyldaý uiydastyryp, onyń barysynda 350-den astam azamattyń ótinishi qaralǵan.
Prezident ákimshiliginde qurylǵan front-keńsede de azamattardy jeke qabyldaý kúndelikti júzege asyrylady. Keńse qurylǵan sátten beri 500-den astam qabyldandy. Dál osyndai front-keńseler elimizdiń barlyq óńirinde qurylǵan.
