Ákimniń bárin aýystyrý - meniń negizgi maqsatym emes. Bul týraly «QAZAQSTAN» ulttyq telearnasyndaǵy suhbaty kezinde Memleket basshysy Qasym-Jomart Toqaev málim etti, dep habarlaidy QazAqparat.
Suhbat barysynda tilshi bolyp jatqan kadrlyq ózgerister jaiynda surady. «Biraq ákimderdiń basym kópshiligi áli ornynda otyr. Olardyń jaǵdaiy qalai bolmaq? Aldaǵy ýaqytta oblys ákimderi sailana ma?» dep suraq qoidy ol.
Osy oraida Prezident tiisti ózgerister bolatynyn atap ótti.
«Jalpy aitqanda, kadrlyq aýys-túiis – úzdiksiz jalǵasa beretin úderis. Laýazym máńgilik dúnie emes. Jumystyń jańa talabyna ikemdele almaǵan adamdar qyzmetten ketýge májbúr bolady. Olardyń ornyn jańa kadrlar basady. Ákimniń bárin aýystyrý meniń negizgi maqsatym emes. Ákimderdiń jumysyna jan-jaqty taldaý jasalady. Negizgi talap – azamattardyń ál-aýqatyn arttyrý. Sondyqtan qajettilik bolsa, tiisti kadrlyq sheshimderdi qabyldaimyn. Mindetti túrde ózgerister bolady.
Men 2020 jyly halyqqa Joldaýymda alǵash ret aýyl ákimderin sailaý týraly aittym. Kóp uzamai aýyl ákimderin sailadyq. Byltyrǵy Joldaýymda «Kelesi qadam – aýdan ákimderiniń sailaýy» dep aittym. Ony 2024 jyly ótkizemiz. Bálkim, pilottyq joba retinde kelesi jyldan bastasaq, oryndy bolar», - dedi Qasym-Jomart Toqaev.
