Soltústik Qazaqstan oblysynyń qurmetti azamaty, maidanger, ólketanýshy, jazýshy Sergei Presniakov búgin 100 jasqa toldy, dep habarlaidy QazAqparat.
Petropavlda Ekinshi dúniejúzilik soǵystyń ardageri Sergei Presniakovtyń mereitoiyna orai saltanatty jiyn ótti. Maidangerge qurmet kórsetý kezinde SQO ákimi Qumar Aqsaqalov el Prezidentiniń alǵys hatyn oqyp, tósbelgini tabys etti.
«Sergei Mihailovichtiń esimi Soltústik Qazaqstan oblysynyń tarihyna altyn áriptermen jazylǵan. Sergei Presniakov – bizdiń el tarihyndaǵy kóptegen oqiǵalardyń kýágeri jáne qatysýshysy. Ol Máskeý túbindegi shaiqastarda soǵysyp, 38 atqyshtar brigadasynda qyzmet etti. Soǵystan keiin partiia organdarynda jumys istedi, ardagerler uiymyn basqardy.
Ómiriniń kóp bóligin bizdiń aimaqtyń tarihyn zertteýge arnady. Soltústik Qazaqstannyń ólketanýynyń damýyna baǵa jetpes úles qosty. Stýdentterge ólketaný jáne týǵan ólke tarihy kýrstarynan sabaq berdi. Onyń avtorlyǵymen jazylǵan kitaptar arqyly oqyrman el tarihynan habardar bolady», - dedi óńir basshysy.
Sergei Presniakov kóptegen orden-medaldyń iegeri, «Qurmet belgisi» ordenin ǵana 4 ret alǵan. Reseidiń Samara oblysynyń týmasy SQO-ǵa shamamen 90 jyl buryn kelgen eken. Eńbek jolyn 1939 jyly Omby temirjoly Petropavl stansasynda ekonomist bolyp bastaidy. Kóp uzamai soǵys bastalyp, 19 jasynda Sergei Presniakov maidanǵa attanady. Batys, soltústik-batys maidandary men Máskeý túbindegi shaiqastarǵa qatysady.
Soǵystan keiin ártúrli salada jumys istedi. Zeinet demalysyna shyqqasyn da qyzmetten qol úzbei, Petropavl joǵary oqý ornynda týǵan ólke men Qazaqstan tarihynan sabaq beredi. Ólke tarihyn zertteýden de qol úzbeidi. Sergei Presniakov 10-nan astam kitaptyń avtory. Sonyń ishinde 300-den astam maqala kirgen «Soltústik Qazaqstan oblysy» entsiklopediiasy da bar.
1980-shi jyldary Sergei Presniakov SQO ardagerler keńesiniń tóraǵasy bolǵan tusynda onyń bastamasymen Petropavlda Jeńis saiabaǵy paida boldy.
