QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Ulttyq biryńǵai testileýdi jańa jaǵdaida ótkizýge daiyndyq máselesi qaraldy, dep habarlaidy "Ult aqparat" primeminister.kz saityna silteme jasap.
Úkimet basshysynyń dereginshe, Ulttyq biryńǵai testileý osy jyldyń 20 maýsymynan 5 shildesine deiin ótkiziledi. Oǵan 131 myńnan astam oqýshy nemese byltyrǵy jylmen salystyrǵanda 12%-ǵa kóbirek (117 myń) oqýshy qatysady. UBT-ny ótkizetin 161-ge jýyq pýnkt, 1 200-den astam aýditoriia daiyndaldy, qadamdyq nusqaýlyq qabyldandy.
UBT dástúrli tártipte, alaida sanitarlyq-epidemiologiialyq talaptardy qatań saqtai otyryp ótkiziledi. Osylaisha, koronavirýs infektsiiasynyń taralý qaýpin azaitý úshin 5 zararsyzdandyrý sharasy qoldanylady, atap aitsaq: test tapsyrýshynyń dezinfektsiialaý tonneli arqyly ótýi, aiaq kiimdi arnaiy dezinfektsiialaýshy kilemshede óńdeý, qoldy sanitaizermen tazalaý, temperatýrany ólsheý, bir ret qoldanylatyn maska usyný. UBT ótkizý pýnktterine kirý tártibi boiynsha test tapsyrýshylar arasyndaǵy araqashyqtyq keminde 2 m-di quraityn bolady.
«Eń basty mindet balalardyń qaýipsizdigin qamtamasyz etý bolyp sanalady. Barlyǵy tynysh jaǵdaida ótýi kerek, túlekter nazaryn tek testke aýdarýy tiis. Dástúrli túrde ata-analar úshin testileýdiń onlain taratylymyn uiymdastyrý kerek, osylaisha UBT úderisiniń ashyqtyǵy men aiqyndylyǵy qamtamasyz etiledi», — dedi A. Mamin.
Úkimet basshysy bilim jáne ǵylym, densaýlyq saqtaý, ishki ister ministrlikterine jáne óńirler ákimdikterine UBT-ny sapaly ótkizýdi jáne sanitarlyq talaptardyń múltiksiz saqtalýyn qamtamasyz etýdi tapsyrdy.
Aqparat jáne qoǵamdyq damý ministrligine UBT-ny qazirgi jaǵdaida ótkizý boiynsha keń aýqymdy aqparattyq-túsindirý jumystaryn júrgizý tapsyryldy.
Óńirlerdiń ákimdikterine test tapsyrý qaýipsizdigin qamtamasyz etý, tasymaldaý normalaryn saqtai otyryp, túlekterdi tasymaldaýdy uiymdastyrý, UBT ótkizý pýnktteriniń aldynda adamdardyń jappai jinalýyn boldyrmaý tapsyryldy.
Aita keteiik, jiyn barysynda Bilim jáne ǵylym ministri Ashat Aimaǵambetov, Nur-Sultan qalasynyń ákimi Altai Kólginov, Almaty oblysynyń ákimi Amandyq Batalov, Soltústik Qazaqstan oblysynyń ákimi Qumar Aqsaqalov baiandama jasady.
