Qazaqstannyń Premer-ministri Asqar Mamin jumys saparymen Aqmola oblysyna baryp, 2020 jyly ótetin Qazaqstan men Reseidiń XVII óńiraralyq yntymaqtastyq forýmyna daiyndyq barysymen tanysty, dep habarlaidy úkimet basshysynyń resmi saity.
Sapar aiasynda Premer-ministr jańa "Bolashaq saraiy" balalar jáne jasóspirimder saraiynyń qurylys alańyna bardy, onda 2020 jyly Qazaqstan men Reseidiń XVII óńiraralyq yntymaqtastyq forýmynyń basty is-sharalaryn ótkizý kózdelgen.
Asqar Maminniń aitýynsha, Qazaqstan men Reseidiń XVII óńiraralyq yntymaqtastyq forýmyn ótkizý eki eldiń saýda-ekonomikalyq qarym-qatynasyn damytýǵa myqty serpin beri
Indýstriialandyrý kartasy aiasynda iske qosylǵan qysh kirpish óndiretin ENKI kásipornynda úkimet basshysy óndiristiń avtomattandyrylǵan protsesi men shyǵarylatyn ónimder túrlerimen tanysty. Zaýytta jyl saiyn 60 millionǵa jýyq qysh kirpish shyǵarylady. Óndiris kólemin 90 millionǵa deiin ulǵaitý máselesi qaraldy.
Oblys ortalyǵynda Asqar Mamin jańadan salynyp jatqan "Saryarqa" shaǵyn aýdanyna baryp, turǵyn úidiń sapasy men qoljetimdiligin arttyrý boiynsha atqarylyp jatqan jumystarmen tanysty. Biyl shaǵyn aýdanda 245 páterden turatyn 6 kóppáterli turǵyn úi qurylysy aiaqtaldy. 2025 jylǵa qarai aýdany 1 million sharshy metr bolatyn 233 kóppáterli turǵyn úi, 2 mektep, sport keshenin paidalanýǵa berý kózdelgen.
Asqar Mamin óńirde avtojoldardy damytýdyń qazirgi kórsetkishteri jáne josparlarymen tanysty. Uzyndyǵy 80 shaqyrym bolatyn Shýchinsk – Zerendi jolyn rekonstrýktsiialaý jobasy aiaqtaldy. Jalpy, óńirde jergilikti mańyzdaǵy 400 shaqyrymnan astam joldyń qurylysy men jóndeý jumystaryn qolǵa alý josparlanyp otyr.
Aqmola oblysynyń Bulandy jáne Býrabai aýdandarynda premer-ministrge aýyl sharýashylyǵy salasynda investitsiialyq jobalardy iske asyrý barysy týraly baiandaldy. 2019 jyly 10,3 milliard teńgege 10 investitsiialyq joba iske asyrylmaq.
Úkimet basshysy óńir ekonomikasyn damytý men halyqtyń ómir súrý sapasyn arttyrýǵa júieli kózqarasty qamtamasyz etýdiń mańyzdylyǵyn atap ótip, Elbasy Nursultan Nazarbaevtyń strategiialyq qujattarda alǵa qoiǵan maqsattaryna ýaqytyly qol jetkizý jáne Memleket basshysy Qasym-Jomart Toqaevtyń óńirge jumys sapary barysynda bergen tapsyrmalarynyń oryndalýy úshin kúsh-jigerdi jumsaý kerektigin aitty.
