Foto: © Sputnik / Vladimir Pesnia
Premer-ministr Álihan Smaiylov Kostenko atyndaǵy shahtadaǵy apat úshin kenshilerdiń otbasynan keshirim surady, dep habarlaidy Sputnik Qazaqstan.
"ArselorMittal Temirtaýdyń" qazirgi jaǵdaiy, sol jerdegi kenshilerdiń qaitys bolýy, investordyń óz mindettemelerin oryndamaýy, árine, bizdiń de jaýapkershiligimiz. Sondyqtan biz zardap shekken, qaitys bolǵan kenshilerdiń otbasylarynan keshirim suraimyz jáne ózimizdiń jaýapkershiligimizdi sezinemiz", - dedi Smaiylov Májilis kýlýarynda jýrnalister suraǵyna jaýap berip.
Buǵan deiin Premer-ministr jańa investor aldaǵy úsh jylda "ArselorMittal Temirtaýǵa" 3 mlrd dollar quiýy kerek ekenin málimdedi.
Esterińizge sala keteiik, 28 qazanǵa qaraǵan túni Qaraǵandy oblysyndaǵy Kostenko atyndaǵy shahtada metan jarylyp, saldarynan 46 kenshi kóz jumdy. Apat faktisi boiynsha qylmystyq is qozǵaldy. Premer-ministrdiń tóraǵalyǵymen úkimettik komissiia quryldy. 29 qazan elimizde Jalpyulttyq aza tutý kúni jariialandy.
Osy apattan keiin prezident "ArselorMittalmen" investitsiialyq yntymaqtasty toqtatýdy tapsyrdy. Úkimet kompaniiany Qazaqstan paidasyna berý týraly aldyn ala ýaǵdalastyqqa qol jetkizilgenin málimdedi.
