Arnaiy ekonomikalyq aimaqtar tikelei mindetterin oryndamai otyr. Bul týraly Úkimet otyrysynda QR Premer-Ministri Álihan Smaiylov aitty, dep habarlaidy QazAqparat.
«Óńdeý ónerkásibin damytý úshin baǵasy qoljetimdi shikizatpen qamtamasyz etý arqyly óńdeý óndiristerin qurýdy yntalandyrý qajet. Búgingi tańda Úkimet taý-ken metallýrgiia kesheniniń iri kásiporyndarymen birlesip, olardyń ainalasynda shaǵyn jáne orta kásiporyndar qurý máselesin pysyqtap jatyr. Indýstriia ministrligine taý-ken metallýrgiia kesheni kásiporyndarymen birlesip, óńdeý deńgeii orta jáne joǵary ónimder shyǵaratyn óndiristerdi qurýdy yntalandyrý boiynsha keshendi sharalar ázirleýdi tapsyramyn», - dedi Premer-Ministr.
Álihan Smaiylov Prezident qomaqty biýdjettik qarjylandyrýǵa jáne memlekettik qoldaý sharalaryna qaramastan, arnaiy ekonomikalyq aimaqtardyń el ekonomikasyna qosyp otyrǵan úlesi tómen ekenin atap ótkenin eske saldy.
«Basqarýshy kompaniialardyń jumysy tiimsiz. Investorlar arnaiy ekonomikalyq aimaqtarǵa kirý, qajetti infraqurylymnyń bolmaýy, basqarýshy kompaniialardyń salǵyrttyǵy siiaqty únemi túrli kedergilerge tap keledi. Ýákiletti memlekettik jáne jergilikti atqarýshy organdar tarapynan tiisti baqylaý men úilestirý joq. Shyndap kelgende, investitsiialar tartýy tiis arnaiy ekonomikalyq aimaqtar ózderiniń tikelei mindetterin oryndamai otyr», - dedi ol.
Sondyqtan Úkimet basshysy arnaiy ekonomikalyq aimaqtardyń jumys isteý mehanizmderin túbegeili qaita qarap, barlyq jobalar men qatysýshylarǵa tekserý júrgizý kerektigin basa aitty.
«Jaǵdaidy túzetýge ýaqyt óte tyǵyz. Sondyqtan Indýstriia ministrligine múddeli memlekettik organdarmen jáne uiymdarmen birge tiisti jumys tobyn quryp, 1 naýryzǵa deiin osy máseleler boiynsha, onyń ishinde qajetti zańnamalyq túzetýlerge qatysty naqty usynystar ázirleýdi tapsyramyn», - dedi Álihan Smaiylov.
