© AP Photo / Petr David Josek
21 jeltoqsan keshkisin Chehiia astanasy Praganyń ortalyǵyndaǵy Karlov ýniversiteti filosofiia fakýltetiniń ǵimaratyna bir adam qarýmen shabýyl jasady. Chehiia qoǵamdyq telearnasynyń habarlaýynsha, shabýyldan kemi 10 adam qaza taýyp, onnan asa adam jaralanǵan, dep jazady Azattyq.
Politsiia oq atqan adam da óltirilgenin habarlady. Al Praga qalasynyń meri Bogýslav Svoboda Chehiia qoǵamdyq telearnasyna bergen jaýabynda shabýyldaǵan adam biikten sekirip ketkenin aitty.
Bul adamnyń Chehiia azamaty ekenin aityldy, biraq onyń ne úshin oq atqany belgisiz.
Kýágerlerdiń biri Azattyqtyń Orys qyzmetine aitýynsha, Praga ýaqytymen túski úsh kezinde ýniversitet qyzmetkerlerine ǵimaratta qarýly adam júrýi múmkin dep habarlanǵan.
Karlov ýniversitetinde sabaq beretin Azattyq radiosy Orys qyzmetiniń telejúrgizýshisi Sergei Medvedev atys kezinde oqiǵa ornynda bolǵan. Ol ýniversitette sabaq berip jatqan. Medvedev basynda aýditoriiada jasyrynǵanyn, keiin basqa jaqqa evakýatsiialanǵanyn aitty.
Chehiianyń Novinky.cz saity jariialaǵan sýretterde qolyn kóterip turǵan adamdar, qashyp bara jatqandar kórinedi. Chehiiadaǵy aqparat agenttikteri oqiǵa ornynda politsiia men qutqarýshylar júrgenin, ýniversitet mańyna eldiń ishki ister ministri Vit Rakýshan kelgenin jazyp jatyr.
Aita keteiik, Praga álemdegi eń qaýipsiz qalalardyń biri sanalady.
