«Jolaýshylar tasymaly» AQ poiyz biletterin jáne onyń aqshasyn qaitarý boiynsha suraqtarǵa jedel jaýap beretin WhatsApp nomerin iske qosty, dep habarlaidy "Ult aqparat".
Aqshany qaitaryp alý biletti satyp alý ádisine qarai qolma-qol aqshamen jáne qolma-qol aqshasyz iske asyrylady:
- stansadan poiyz jóneltilgenge deiin 1 saǵattan keshiktirmei biletti qaitarǵan jaǵdaida qarajat 5 jumys kúni ishinde tóleýshiniń kartasyna túsedi;
- stansadan poiyz jóneltilgenge deiin 1 saǵattan az ýaqyt qalǵanda biletti qaitarǵan jaǵdaida qarajat jolaýshynyń ótinishi negizinde 30 kúntizbelik kún ishinde jolaýshynyń kartasyna túsedi.
Bilet qunyn qaitara almaǵan jolaýshylar WhatsApp +7-707-270-36-64 nómirine habarlasa alady.
«Suraý salýdy jibergen kezde jol júrý qujatynyń (bilettiń) nómirin kórsetý kerek nemese bilet kassasyna júgingen kezde jol júrý qujatynyń (bilettiń) fotosýretin jáne jol júrý qujatyn (biletin) qaitarý týraly túbirtekti jiberý qajet», - delingen aqparatta.
Aita keteiik, erejege sáikes biletti qaitarǵan kezde:
- poiyz jóneltilgenge deiin 24 saǵattan keshiktirilmese – bilettiń tolyq quny qaitarylady;
- 24 saǵattan keshiktirilip, biraq poiyz jóneltilgenge deiin keminde 6 saǵat buryn ótkizilse – bilet quny jáne platskart qunynyń 50% qaitarylady;
- poiyz jóneltilgenge deiin keminde 6 saǵat buryn jáne jóneltilgennen keiin 1 saǵattan artyq emes ýaqytta qaitarylsa – bilettiń quny qaitarylady, bul rette platskarttyń tolyq quny ustalady.
Poiyz jóneltilgennen keiin 1 saǵattan soń biletti qaita ótkizýge bolmaidy jáne onyń aqshasy qaitarylmaidy.
«Al jolaýshylar poiyzynyń qatynaýy toqtaǵan jaǵdaida jolaýshylar jol júrý qujattaryn (biletterin) qaitarýdy resimdep, aqshalai qarajattaryn tolyq kólemde qaitaryp ala alady. Jolaýshylar jol júrý qujattaryn satyp alǵan jerde qaitarý qajet», - dep naqtylady «Jolaýshylar tasymaly» AQ-dan.
