Álemge áigili Palgrave Macmillan baspasynda «Postkeńestik 15 eldegi memlekettik basqarýdyń evoliýtsiiasy: transformatsiianyń túrliligi» atty biregei eńbek jaryq kórdi.
Bul – alǵash ret postkeńestik barlyq 15 eldegi memlekettik basqarý reformalary men damý kórsetkishterin salystyrmaly taldaýdy qamti otyryp, memlekettik basqarý transformatsiiasyn zertteitin aýqymdy eńbek. Kitap - barlyq 15 elden, memlekettik basqarý men memlekettik qyzmet reformalaryna tikelei at salysqan 25 ǵalym jáne praktikterdiń eki jyldyq birlesken jumysynyń nátijesi.
Kitap Astana memlekettik qyzmet haby Basqarýshy komitet tóraǵasy Alihan Baimenov pen halyqaralyq sarapshy Panos Liverakostyń redaktsiialaýymen jaryq kórdi. Bul jumystyń retsenzentteri - memlekettik basqarý ǵylymy patriarhy, AQSh-taǵy birqatar reformalar basynda turǵan, professor Chester Niýland, Koreia Respýblikasynyń burynǵy Adami resýrstar ministri, professor Pan Sýk Kim jáne Singapýrdaǵy Halyqaralyq memlekettik basqarý ortalyǵynyń burynǵy basshysy, tanymal sarapshy Maks Everest Fillips.
Ǵalymdar bul basylymnyń biregeiligi men ózektiligin atap ótýde. Máselen, professor Niýland: «Bul - burynǵy keńestik árbir 15 respýblikanyń árqaisysyndaǵy otyz jyldyq transformatsiia jaily alǵashqy kásibi zertteý... Kitap bilimdi tereńdetedi ári osy máselelerdi ómirlik turǵydan túsinýge yqpal jasap, bul ony oqýǵa paidaly etedi», - dep jazǵan. Kitapqa alǵy sózdi BUU Bas hatshysynyń kómekshisi, BUUDB-nyń Eýropa jáne TMD elderi boiynsha Óńirlik biýrosynyń direktory Miriana Spoliarich Egger jazǵan.
Ózi 600-dei betten turatyn kitapta 16 taraý bolsa, onyń 15-de ár eldegi memlekettik basqarý men memlekettik qyzmetti qaita qurý traektoriiasy egjei-tegjeili qaralyp, reformalarǵa salystyrmaly saraptama jasalynady. Qazaqstanǵa arnalǵan taraý «Progress jáne onyń paradokstary» dep atalady. Ony Alihan Baimenov, sarapshylar Maqsut Óteshev jáne Gúlimjan Súleimenova jazǵan.
Jalpy, kitap postkeńestik keńistiktegi ákimshilik júieler damýy boiynsha zertteýlerdiń jetkiliksizdigine bailanysty memlekettik basqarý ǵylymyndaǵy oisyraǵan oryndy toltyrýǵa baǵyttalǵan. Qazirgi tańda kitap elektrondy túrde myna silteme boiynsha qoljetimdi, sonymen qatar ony Amazon jelisinde jáne Palgrave Macmillan baspasyna tapsyrys berý arqyly alýǵa bolady.
Palgrave Macmillan – álemdik deńgeidegi 175 jyldyq tájiribesi bar, gýmanitarlyq jáne áleýmettik ǵylym salasyndaǵy eń ozyq ári arnaiy júldelermen marapttalǵan zertteýlerdi shyǵaratyn iri basylym. Buǵan deiin Astana memlekettik qyzmet haby men onyń Basqarýshy komitet tóraǵasy Alihan Baimenov memlekettik basqarý ǵylymy men isine qosqan zor úlesi úshin Amerika memlekettik basqarý assotsiiasynyń (ASPA) «Memlekettik basqarýdyń halyqaralyq júldesimen» marapattalǵan.
