Avstriiada doping qoldandy degen kúdikpen ustalǵan qazaqstandyq shańǵyshy Aleksei Poltaranin konsýldarmen bailanysta bolýdan bas tartqan. Bul týraly syrtqy ister ministriniń orynbasary Erjan Ashyqbaev málimdedi, dep habarlaidy "Ult aqparat".
«Ázirge, Poltoranin bailanysqa shyǵýdan bas tartýda. Bizdegi aqparatqa súiensek, ol konsýlmen kezdespegen. Aldaǵy kúnderi jaǵdai naqtylanady degen oidamyz. Tiisti saýaldar túsken jaǵdaida, qajetti kómek kórsetiledi», - dedi QR Syrtqy ister ministriniń orynbasary Erjan Ashyqbaev Parlament Májilisinde tilshiler saýalyna jaýap bere otyryp.
Sonymen qatar, Qazaqstan tarapy ádil sport ustanymyn negizge alatynyn atap ótti. «Dopingpen kúres, sportshylarmen ashyq dialog sekildi ustanymǵa árqashan da mán berip kelemiz. Biz taza sportqa, sondai-aq bizdiń barlyq sportshylar úshin birdei jaǵdai jasaýǵa ekpin qoiýdamyz. Qazaqstan IýNESKO-nyń tiisti konventsiiasyna qosyldy jáne barlyq standarttar pysyqtalýda», - dedi E. Ashyqbaev.
Aita ketsek, Avstriianyń Zeefeld qalasynda shańǵy jarysynan ótip jatqan álem chempionatynda doping daýy shyqty.
27 aqpan kúni Avstriia politsiiasy doping qoldandy degen kúdikpen bes sportshyny ustaǵan bolatyn. Olardyń arasynda qazaqstandyq sportshy Aleksei Poltoranin men Estoniia, Avstriianyń sportshylary bar.
Estoniialyq sportshylar Karel Tammiarv men Andreas Veerpalý, sondai-aq Qazaqstan ókili Aleksei Poltoranin Halyqaralyq shańǵy sporty túrleri federatsiiasynan shettetildi. Al Avstriianyń Ulttyq dopingke qarsy agenttigi Dominik Baldaýf pen Maks Haýkeni sporttan shettetti.
Mádeniet jáne sport ministri Arystanbek Muhamediuly shańǵyshymen qazaqstandyq zańgerler jumys istep jatqanyn málimdegen bolatyn.
