Almatyda jas ánshi Erjan Maksimniń «Armannan qalma!» atty ániniń tusaýy kesildi. (Don’t forsake your dream). Ol ony 24 qarashada Polshanyń Glivitse qalasynda ótetin «Junior Eurovision» halyqaralyq vokaldyq baiqaýynda oryndaidy, dep habarlaidy QazAqparat.
Almatyda ótken baspasóz máslihatynda baiqaýǵa arnalǵan ánniń beinebaiany kórsetildi. Onyń rejisseri - Aleksandr Flomboim, prodiýseri - Sergei Rýtskii. Ánniń avtorlary -Hamit Shanǵaliev, Daniiar Aldabergenov jáne Timýr Balymbetov.
«Ánniń maǵynasy – armandaýdyń mańyzdylyǵy jáne armanǵa jetý jolyndaǵy qiyndyqtarǵa berilmeý qajettiligi jaiynda. Ózime bul án keledi dep oilaimyn. Beinebaianda men, hanshaiym bolýdy ańsaǵan kishkentai qyzdyń armanyn iske asyrýshy siqyrshynyń rólin somdaimyn. Bul meniń alǵashqy beinebaianym. Barlyǵyńyzǵa unaidy dep senemin», - dedi Erjan Maksim.
«Habar» telearnasynyń direktory Dinara Bisembinanyń aitýynsha, agenttik 2016 jyldan osy baiqaýdy uiymdastyryp keledi. Eýropalyq habar taratý odaǵynyń (EBU) múshesi bolyp tabylady.
«Uzaq kelissózderden keiin Qazaqstannyń atynan baiqaýǵa bir úmitkerdi usynýǵa múmkindik týdy», - deidi ol.
Biyl «Habar» agenttigi ulttyq irikteýdi ótkizbei-aq, Erjan Maksimniń kandidatýrasyn usynýǵa sheshim qabyldady.
«Ol ótken jyly Eýrovidenieniń ulttyq irikteýine qatysyp, ekinshi orynǵa ie boldy. Erjan Reseidiń «Daýys» jobasyna qatysýymen tanymal jáne tek Qazaqstanda ǵana emes, sonymen qatar kórshi elderdiń de kórermenderine jaqsy tanys. Onyń Qazaqstandy halyqaralyq arenada laiyqty túrde tanyta alatyndyǵyna senimdimiz », - dedi Dinara Bisembina.
Baiqaýdyń finalyn «Habar» arnasy tikelei efirde kórsetedi.
Aita keteiik, Qazaqstan bul baiqaýǵa alǵash ret 2018 jyly Minskide (Belarýs) qatysty.Sol baiqaýda Qazaqstannyń atynan «Ózińe sen» ánimen Daneliia Tóleshova shyqty. Ol altynshy orynǵa ie boldy. Bas júldeni polshalyq Roksanna Vengel ielengen bolatyn. Ekinshi oryndy Frantsiia ánshisi Angelina jeńip alsa, úshinshi oryn avstraliialyq Djael Ýenaǵa buiyrdy.
