Ishki ister ministriniń keńesshisi Nurdildá Oraz elimizde tótenshe jaǵdaidyń jariialanýyna bailanysty respýblika boiynsha qansha politsiia men Ulttyq ulan sarbazy kúsheitilgen rejimde jumys isteitinin aityp berdi, dep habarlaidy QazAqparat.
«Memleket tarapynan bul qadamdar azamattardyń múddesi men qarapaiym jurttyń densaýlyǵyn, ómirin saqtaý úshin jasalyp jatqanyn túsiný kerek. Koronavirýs aýyl-aimaqqa tarap ketpes úshin Nur-Sultan men Almaty qalalary karantinge jabylǵaly otyr. Karantindi eń aldymen komendanttyq saǵatpen shatastyrmaýymyz kerek. Ol degenimiz birqatar shekteý qoiylady degen sóz. Qazir eki qalanyń ákimdiginde barlyq júkteme bar. Iaǵni búgin túngi 00.00-den bastap eki qalada karantin engiziledi», - dedi Nurdildá Oraz «Qazaqstan» ulttyq arnasyndaǵy «Ashyq alań» baǵdarlamasynda.
Ministrdiń keńesshisi sonymen qatar IIM tarapynan birqatar statistikalyq málimetpen bólisti.
«Tótenshe jaǵdaidyń engizilýine bailanysty respýblika boiynsha IIM-nen 8 myń politsei, Ulttyq ulannan 4 myń ásker belgilendi. Olardyń bári birinshiden strategiialyq jáne memlekettik mańyzy bar (qala men oblystar boiynsha 50-ge jýyq) ǵimarattardy baqylaýǵa alady. Patrýlder, jaiaý ásker - bári osy nysandarǵa jaqyndatylady», - dedi Nurdildá Oraz.
Nurdildá Orazdyń sózine sensek qazir juqtyrýy múmkin degen azamattardyń bári anyqtalǵan. Olardyń bárine politsiia qyzmetkerleri sanitarlyq qyzmetkerlermen birge baryp, kúdikti bolsa densaýlyq saqtaý mekemelerine jetkizedi.
«Qazirgi tańda áleýmettik jelide jalǵan aqparat tarap jatyr. Osy aqparattarǵa bailanysty halyqty tek resmi málimetterge senýge shaqyramyz. Óitkeni jalǵan aqparattyń bári birinshiden qoǵamdyq tártipti buzyp, ekinshiden turaqtylyǵymyzǵa syna qaǵýy múmkin. Sol sebepti osyny umytpai, jalǵan aqparatty taratýǵa qylmystyq jáne ákimshilik jaýapkershilik qarastyrylatynyn eskerýimiz kerek. Máselen kúni keshe azamattardyń karantin aýmaǵynan qashyp ketý jaǵdaiy Túrkistan oblysynda tirkeldi. Almatyda juqtyrǵan azamattyń basqa qandai adamdarmen bailanysqa túskeni jaily aqparatty bermeýi sekildi oqiǵa boldy», - dedi ol.
Aita ketsek keshe QR Premer-Ministri Asqar Maminniń tóraǵalyǵymen QR Prezidenti janyndaǵy tótenshe jaǵdai rejimin qamtamasyz etý jónindegi memlekettik komissiianyń otyrysynda Nur-Sultan jáne Almaty qalalarynda karantin rejimi engizý týraly sheshim qabyldanǵan bolatyn.
Eske sala ketsek, QR Densaýlyq saqtaý ministrliginiń málimetinshe, búgin Covid-19 indetiniń taǵy eki faktisi Almaty qalasynda rastalǵan. Búgingi tańda Qazaqstanda koronavirýspen aýyratyndar sany 35-ke jetti. Onyń ishinde 17 jaǵdai - Almatyda, 18 fakti - Nur-Sultanda tirkelip otyr.
