Almatynyń ortalyq kóshelerinde esirtki jarnamasy týraly bannerler kópshiliktiń narazylyǵyn týdyrdy, dep habarlaidy QazAqparat tilshisi.
Bul týraly qoǵamdyq belsendisi Ásem Japisheva Facebook paraqshasynda jazdy.
Post avtory mundai jarnamalyq bannerlerdi birneshe ortalyq kósheden kórgen.
«Bannerde QR-kod pen sait ataýy kórsetilgen. Sol kod arqyly saitqa ótip, staff, spid, mefedron, kristal basqa da zattardy alýǵa bolatyny kórsetilgen. Odan da soraqysy banner ilgen adamdar aifon, taǵy basqa zattardy oinatý úshin baiqaý uiymdastyrǵan. Baiqaý talaptary – banner qasynda sýretke túsip, dostar men tanystardy tegtei otyra áleýmettik jelide jariialaý kerek. Tek bul fitnes ortalyqtyń jarnamasy emes, esirtki dilerleriniń jarnamasy», - dedi ol.
Qoǵam belsendisi mundai bannerlerdiń Qazaqstannyń 5 iri qalasy Nur-Sultan, Qaraǵandy, Shymkent, Óskemen, Almatyda bar ekendigin aitty.
«Bul derek qalalyq Politsiia departamentiniń esirtki biznesine qarsy kúres basqarmasynyń baqylaýyna alyndy. Quqyq qorǵaý organdary tarapynan shuǵyl sharalar qolǵa alyndy. Tekserý nátijesinde bannerdi jariialaǵan kompaniia anyqtaldy. Jaqyn arada tapsyrys berýshi de tabylyp qalady», - dedi Politsiia departamentinen.
Politsiia qazir bul bannerlerdi alyp tastaýda.
