Reseilik oppozitsiialyq saiasatker Aleksei Navalnvyi 24 qyrkúiek kúni tańerteń abaqtyda 30 kúndik ákimshilik qamaýda otyryp shyqqan bette ustaldy. Bul týraly oppozitsionerdiń serigi Leonid Volkov Twitter-de habarlady, dep jazady Azattyq.
Keiin ol Navalnyidy "Danilovskii" ishki ister bólimine aparǵanyn jáne ústinen "Adam densaýlyǵyna zaqym keltirgen miting ótkizý tártibin buzý" baby boiynsha ákimshilik is qozǵap jatqanyn jazdy. Volkovtyń sózinshe, mundai bap Reseide "eshqashan qoldanylmaǵan". Bul bap boiynsha 300 myń rýblge deiin aiyppul salý nemese 20 táýlik ákimshilik qamaýǵa alý jazasy qarastyrylǵan. Volkovtyń pikirinshe, Navalnyidyń ústinen "oidan quralǵan jańa qylmystyq is qozǵap jatyr".
Navalnyidyń baspasóz hatshysy Kira Iarmyshtyń habarlaýynsha, saiasatkerge qarsy jańa isti Máskeýdiń Simonovskii aýdandyq soty qaraidy.
Tamyzdyń sońynda sot Navalnyidy 28 qańtarda "sailaýshylar ereýili" aktsiiasyna qatysqany úshin 30 táýlik ákimshilik qamaýǵa alǵan. Navalnyidyń jaqtastary onyń ustalyp, qamalǵanyn 9 qyrkúiekke josparlanǵan zeinetaqy reformasyna qarsy aktsiialarmen bailanystyrady. Navalnyidyń ustalǵanyna qaramastan, jaqtastary Reseidiń 83 qalasynda aktsiialar uiymdastyrǵan.
11 qyrkúiekte Rosgvardiia basshysy Viktor Zolotov Aleksei Navalnyidyń Sybailas jemqorlyqpen kúres qory Rosgvardiia qyzmetkerleri memlekettik satyp alý kezinde zań buzǵany týraly zertteýin jariialaǵan soń Navalnyidy dýelge shaqyrǵan. Navalnyi qamaýda otyrǵandyqtan oǵan jaýap bere almaǵan. Sybailas jemqorlyqpen kúres qory zertteýde keltirilgen aqparaty úshin sotta jaýap berýge daiyn ekenin málimdegen.
