Nur-Sultanda politseilerge baǵynbai qashqan kinálilerdiń memlekettik tirkeý nómiri belgisiniń urlyǵyna da qatysy bar bolyp shyqty, – dep habarlaidy Polisia.kz.
“Esil” aýdanynyń Politsiia basqarmasyna elorda turǵyny belgisiz bireýler onyń Kia Rio avtokóliginen memlekettik tirkeý nómirin urlap ketkenin aityp aryzdanǵan.
"Aryzdanýshy áleýmettik jelilerdegi jańalyqtardan “Nur-Sultandaǵy politseilerdiń qýǵynyn” kórip, beinerolikten tártip buzǵan júrgizýshiniń júksalǵyshynda kórinip qalǵan óziniń memlekettik nómirin tanyǵan. Anyqtalǵandai, MTNB urlanǵannan keiin onyń iesi belgilengen jyldamdyqty asyrǵany úshin ákimshilik aiyppuldar týraly habarlamalar alǵan.
Atalǵan fakti boiynsha sotqa deiingi tergeý amaldary júrgizilip jatyr. 61 myń teńgeden astam aiyppuldy kináli tulǵa tóleitin bolady" - delingen aqparatta.
Eske salsaq, buǵan deiin politsiiaǵa eki er adamnyń taýar úshin tólem jasaýdan bas tartyp, avtokólikpen qashyp ketkeni týraly habarlama túsken. Olar politseilerdiń zańdy talaptaryna baǵynbai, qashyp ketpek bolǵan. Sot sheshimimen eki tártip buzýshy da qamaýǵa alynyp, arnaiy qabyldaý-taratý ornyna ornalastyryldy.
