Foto: auto.24tv.ua
Politseiler joldaǵy jaǵdaiǵa bailanysty júrgizýshilerge úndeý jasady.
Aqmola oblysynyń Politsiia departamenti ótken táýlikte eki myńnan asa kólik quralyn alyp júrgenin habarlady.
"Aýa raiynyń nasharlaýyna bailanysty Aqmola politseileri túrli baǵyttaǵy avtokólik tizbegin alyp júrdi jáne kólik quraldarynyń júrgizýshilerimen turaqty negizde túsindirý jumystaryn júrgizdi. Aýa raiynyń nasharlaýy kezinde 2019 avtokólik bolǵan 13 tizbekti alyp júrý uiymdastyryldy", - delingen oblystyq Politsiia departamenti baspasóz qyzmetiniń habarlamasynda.
Kólikter Astana – Petropavl, Shýchinsk – Zerendi, Kókshetaý – Rýzaevka, Stepnogorsk – Aqkól, Astana – Ereimentaý – Shiderti baǵyttarynda bastap júrý arqyly qaýipsiz jerge shyǵarylǵan.
Sondai-aq politseiler 28 jeltoqsanda Aqmola oblysynda qar, burqasyn, kóktaiǵaq túrindegi qatty jaýyn-shashyn kútiletinin eskertti.
"Osyǵan bailanysty politseiler barlyq kólik ielerine jyldamdyqty saqtaýdy, qozǵalys baǵyttaryn retteýdi, tipti uzaq saparlardan bas tartýdy usynady. Tótenshe jaǵdaiǵa tap bolsańyz, 112 biryńǵai jedel járdem nómirine nemese 102 arnaiy telefonyna habarlasyńyz. Júrgizýshiler habarlamalardy nazardan tys qaldyrmańyz", - deidi Aqmola oblysynyń PD ókilderi.
