Túrkistan oblysynyń politseileri Arys qalasynda 170-ten astam «Jolda qabyldaý» oryndaryn uiymdastyrdy, dep habarlaidy "Ult aqparat" óńirdiń Politsiia departamentine silteme jasap.
«Tártip saqshylary jergilikti turǵyndarǵa maldary joǵalyp, ólgen jaǵdaida qaida barý kerektigin túsindirip, keńes beredi jáne páter, turǵyn úide bolǵan urlyqtar, avtokólikterdi aidap áketý jaittary boiynsha derekterdi tirkep, aryzdaryn qabyldaýda. Azamattarǵa yńǵaily bolý úshin mobildi HQO uiymdastyryldy. Aýdan ortalyǵyndaǵy 17 sektordyń árqaisysynda Túrkistan oblysy Politsiia departamentiniń qyzmetkerlerinen qurylǵan eki jedel-tergeý toby jumys jasaýda», - delingen málimette.
Jarylystan keiingi táýlikterde politseiler júrgizgen reidtik sharalar barysynda 4 qylmys anyqtaldy. Onyń ishindegi ekeýi mal urlyǵyna qatysty. Sondai-aq «Niva» avtokóligin urlaý maqsatynda aidap áketý jáne turmystyq tehnika dúkenindegi urlyq derekteri tirkeldi. Búgingi tańda, barlyq materialdar boiynsha sotqa deiingi tergep-tekserý sharalary júrgizilýde.
«Aita ketsek, 24-28 maýsym kúnderi aralyǵynda tártip saqshylary 155 iesiz qoi men 22 iri qara maldy taýyp, politsiia bóliminiń janynan arnaiy uiymdastyrylǵan orynǵa aparǵan. Arys qalasyna jergilikti turǵyndardyń kelýine orai, barlyq maldar zańdy ielerine qaitaryldy», - dedi Politsiia departamentinen.
