Qazaqstannyń patrýl politsiia qyzmetkerleri erlikpen qaza tapqan politsei Darhan Bazarbaevtyń otbasyna kóńil aityp, materialdyq kómek kórsetti, dep habarlaidy oblystyq politsiia departamenti baspasóz qyzmeti.
Eldegi barlyq patrýl politsiiasy atynan SQO jergilikti politsiia qyzmeti basqarmasy bastyǵy Erlan Mádiev Darhannyń týǵan jerine keldi.
«Áriptesimizdiń qazasy - búkil politsiia qyzmetine ortaq qaiǵy dep bilińizder. Orny tolmas jaǵdaiǵa qaiǵyryp kóńil aitamyz. Qazaqstandaǵy ár oblystyń patrýldik politsiia qyzmetkerleri atynan sizderge kelip otyrmyz. Darhannyń erligi - jas politseiler úshin úlgi. Onyń qyzmetke degen adaldyǵy umytylmaidy», - dep atap ótti Erlan Mádiev.
Darhan Bazarbaevtyń otbasyna Qostanai oblysy politsiia departamenti bastyǵynyń orynbasary Ardaq Yntyqbaev ta baryp, kóńil aitty.
«Darhan Bazarbaev ult batyryna, maqtanyshyna ainaldy. Onyń qyzmettegi erligin áriptesteri umytpaq emes. Artynda qalǵan uly da ákesin maqtan tutatynyna kámil senimdimin. Biz onyń otbasyna árdaiym kómektesip turýǵa ýáde beremiz. Jaqyn kúnderi IIB barlyq qyzmetkeri D. Bazarbaevtardyń esepshotyna bir kúndik jalaqysyn aýdarady», - dedi Ardaq Yntyqbaev.
Eske salsaq, qostanailyq politsei Darhan Bazarbaev qyzmetin atqarý kezinde mert boldy.
Keiin QR Prezidenti Qasym-Jomart Toqaevtyń Jarlyǵymen Darhan Bazarbaev III dárejeli «Aibyn» ordenimen nagradtaldy.
