Ishki ister ministri Erlan Turǵymbaev politseilerge alataiaqty qaitarýǵa qatysty túsinikteme berdi, dep habarlaidy Sputnik Qazaqstan.
Ministr alataiaq tek jol qozǵalysyn retteý úshin qoldanylatynyn atap ótti.
"Jol apaty kezinde, jol nashar kóringende, baǵdarsham isten shyqqanda, jóndeý jumystary kezinde kólikke baǵyt-baǵdar bergen kezde, úlken delegatsiialardyń kolonnalaryn alyp júrý úshin qoldanylady. Basqa maqsatta alataiaqty qoldanýǵa tyiym salynǵan", - dedi Turǵymbaev májilis kýlýarynda.
Aitýynsha, qazir jolda kólik aǵyny kóp bolǵandyqtan, olar úsh-tórt qatarmen júredi. Osy kezde inspektor ala taiaqpen kólikti toqtatqan kezde, bul jol qozǵalysy qatysýshylary úshin de, inspektordyń ózi úshin de qaýipti.
"Sondyqtan biz bulai toqtatýǵa tyiym saldyq. Qazir búkil jerde beinebaqylaý júiesi bar. Ár avtokólikte kamera ornatylǵan. Kez kelgen zań buzýshylyq tirkeledi. Sol sebepti jol boiynda alataiaqpen turyp, toqtatýǵa qajettilik joq", - dedi IIM basshysy.
Turǵymbaev inspektorlarǵa táýliktiń qarańǵy ýaqytynda jáne tuman kezinde alataiaqsyz jumys isteý qiynǵa soqqanyn jetkizdi. Tipti, 5 qyzmetker baǵdarsham isten shyqqan kezde, jol qozǵalysyn rettep jatyp dene jaraqatyn alǵan.
"Árine, bul inspektordyń ómiri úshin qaýipti. Ári jol qozǵalysynyń qatysýshylary úshin de túsiniksiz jaǵdai", - dedi ol.
Aitýynsha, qazirgi tańda jańa alataiaqtar satyp alýǵa ótinim túspegen. Al burynǵy alataiaqtardyń barlyǵy osy ýaqyt boiy qoimada saqtalypty.
Ishki ister ministrligi 1 qyrkúiekten bastap jol qozǵalysyn retteý úshin alataiaqty qoldanýǵa kóshken edi.
