Qazaqstanda polietilen paketterge birden tyiym salý múmkin emes. Bul týraly Qazaqstan ekologiialyq uiymdary qaýymdastyǵy basqarmasy tóraǵasynyń orynbasary Eldos Abaqanov aitty, dep habarlaidy QazAqparat.
«Búgingi kúni turmystyq qatty qaldyqtardy qaita óńdeý Qazaqstandaǵy úlken problemalardyń birine ainalyp otyr. Ony sheshý úshin memleket tarapynan naqty sharalar da qolǵa alynǵan.
Atap aitqanda, elimizdiń Ekologiialyq kodeksine sáikes, 2019 jyldyń 1 qańtarynan bastap poligondarda plastikterdi kómýge tyiym salynǵan. Munan bólek, osy jyldyń qyrkúiek aiynda bizdiń qaýymdastyq, Ekologiia ministrligi jáne «Atameken» palatasy arnaiy memorandýmǵa qol qoidy. Atalǵan memorandýmǵa sáikes, 2025 jylǵa deiin kezeń-kezeńimen polietilen paketterdi saýda núktelerinde paidalanýǵa tyiym salynbaq. Sonymen qatar endi saýda núktelerinde mundai paketter tegin berilmeitin bolady», - dedi ol plastika qaldyqtaryn jinaý jáne qaita óńdeý taqyrybyna arnalǵan dóńgelek ústel otyrysy barysynda.
Onyń atap ótýinshe, polietilen paketterge balama ydyraityn biopaketter shyǵaryp, olardyń baǵasyn teńestirgen jón.
«Ekopaket pen polietilen paketterdiń baǵasyn birdei qylsaq, ekologiialyq jaýapkershiligi mol azamattar ekopaketterdi qoldanatyndyǵyna senimimiz mol. Memleket tarapynan qoldaý bolsa, mundai ekopaketterdi saýda núktelerinde tegin de berýge bolar edi. Jalpy, búginde Qazaqstan boiynsha kúnine 15 million polietilen paketi qoldanylady eken. Al biopaketterdiń úlesi tym az. Kúni keshe ǵana qaǵaz paket shyǵaratyn kásiporyn basshylyǵymen kezdestim. Olar úlken bir saýda jelisimen kelisimge kelip, 1 mln qaǵaz paket satý-satyp alý kelisimshartyn jasasqan eken. Jalpy, búgingi kúni polieitlen paketterdi shyǵarýǵa tyiym salý múmkin emes», - dedi Eldar Abaqanov.
