Almaty oblysynda politsiia qyzmetkeri Aslan Álserovtiń ólimine qatysty is boiynsha kúdikke ilingen kámeletke tolmaǵandarǵa qatysty bultartpaý sharasy tańdaldy. Sot sheshimimen olar úiqamaqqa alyndy, dep habarlaidy ult.kz.
Jasóspirimderdiń advokattary Gaýhar Saryeva men Dinara Shámshekovanyń aitýynsha, Kegen aýdandyq sotynyń tergeý sýdiasy kúdiktilerdi tergeý izoliatoryna qamaýdan bas tartyp, olarǵa úiqamaq túrindegi bultartpaý sharasyn qoldanǵan.
Jaqyn kúnderi olarǵa elektrondy bilezik taǵylyp, beinebaqylaý júiesi ornatylady.
Advokattardyń sózinshe, sot otyrysy barysynda qorǵaý tarapy tergeý aiasynda muqiiat tekserilýge tiis jaittarǵa nazar aýdarǵan.
"Balalardyń uzaq jyldar boiy júieli túrde zorlyq-zombylyq pen qatygezdik jaǵdaiynda ómir súrgen bolýy múmkin ekenin joqqa shyǵarýǵa bolmaidy. Olar tek kýáger emes, ózderi de sondai áreketterdiń qurbany bolǵan bolýy yqtimal. Biz muny dáleldengen fakt retinde aityp otyrǵan joqpyz, sondyqtan bul derekterdiń barlyǵy tergeý barysynda jan-jaqty tekserilýi qajet", – dedi advokattar.
Eske salaiyq, 23 maýsymda Almaty oblysynyń Kegen aýdanynda 37 jastaǵy politsiianyń aǵa jedel ýákili Aslan Álserovtiń órtengen máiiti tabylǵan bolatyn.
Kisi óltirdi degen kúdikpen marqumnyń jubaiy, uly jáne taǵy bir jasóspirim ustaldy. Tergeý málimetinshe, qylmys Almatydaǵy otbasynyń páterinde jasalǵan. Keiin máiit Kegen aýdanyna jetkizilip, qylmystyń izin jasyrý maqsatynda órtelmek bolǵan.
Atalǵan fakti boiynsha Qazaqstan Respýblikasy Qylmystyq kodeksiniń 99-babynyń 2-bóligi («Adam óltirý») boiynsha qylmystyq is tergelip jatyr.
