QR Aqparat jáne qoǵamdyq damý ministri Dáýren Abaev Májilistiń ekinshi oqylymynda maquldanǵan eldegi beibit jinalystar týraly zań jobasyna qatysty taǵy bir ret pikir bildirdi, dep habarlaidy QazAqparat.
«Memleket basshysynyń tikelei tapsyrmasymen bul zań jobasyn ázirledik. Ártúrli alańda óte kóp talqydan ótkizdik. Kóptegen ózgeris engizildi. Sarapshy depýtattar ǵana emes, quqyq qorǵaý salasynyń mamandary, azamattyq belsendiler de óz ózgeristerin engizdi. Álbette qazir zań jobasy aitarlyqtai ózgerdi. Alaida ózgeristerdiń deńgeiin salystyra salýdyń eń qarapaiym joly – zań jobasynyń buryn jáne búgin qalai bolǵanyn oqi salý ǵana», - dedi Dáýren Abaev «Ashyq dialog» baǵdarlamasynda.
Ministr óz sózin birneshe mysalmen shegelei tústi.
«Qazir biz uǵymdardyń bárin de aiqyndap aldyq. Beibit jiyn, piket, miting, sherý, demonstratsiia, uiymdastyrýshy, qatysýshy – bári aiqyndaldy. Biz halyqaralyq quqyq qorǵaý uiymdarynyń usynystaryn oryndadyq», - dedi ol.
Dáýren Abaev buryn mitingterdi tek ákimdikterdiń ruqsatymen ótkizý múmkin bolǵanyn eske saldy.
«Qazir piketter men jiyndarǵa shyǵý úshin tek bilikke habarlandyrý kerek. Ruqsat alýdyń qajeti joq. Bul – Prezidenttiń tapsyrmasy boldy. Buryn miting ótkiziletin jerdi máslihattar belgileitin. Qazir arnaiy oryndar túsinigi engizilýde. Bul rette Prezidenttiń tapsyrmasymen negizgi talap – qalanyń syrtynda bolmaýy kerek. Máselen piketterdi kez kelgen jerge ótkize berýge bolady. Kelesi: zańnyń sipaty týraly. Negizgi retteý buryn máslihattardyń qaraýynda edi. Biz tikelei yqpal etýshi zańdy jasadyq. Buryn 10 kún buryn ótinim berý talaby boldy. Qazir – 5 kún», - dedi ol.
Ministr ótinimderdi qaraý mehanizmine de ózgeris engizilgenin, jańa zańda talaptardyń naqty merzimderi naqtylanǵanyn aityp ótti.
«Shynymdy aitsam, liberalizatsiialanǵan atalǵan zańdy túkke turǵysyz etkisi keletin adamdardyń oilaryn túsinemin. Olar da erkindik úshin kúresýshi mártebesin de saqtap qalý kerek. Biraq olar bir mańyzdy jaidy túsinbeidi: kózge kórinip turǵan, jaqsarǵan zań jobasyn moiyndamai olar memleket pen qoǵamnyń dialogyna ziianyn keltiredi», - dep túidi Dáýren Abaev.
