Almaty qalasy turǵyn úi saiasaty basqarmasynyń basshysy Erjan Seitenov onlain brifing barysynda Múlik ieleriniń birlestiginiń páter ieleri kooperativinen basty ereksheligin aitty, dep habarlaidy QazAqparat.
Onyń aitýynsha,turǵyndar óz úilerin derbes basqarýǵa múmkindik alady. Qazir PIK barlyq úilerden ortaq shotqa aqsha jinasa, onyń qalai jumsalatynyn baqylaý qiyn. Eger MIB qurylsa turǵyndar qarajattyń maqsatty jumsalýyn qadaǵalai alady.
Sonymen qatar, PIK bir ýaqytta kóppáterli turǵyn úidiń ortaq múlkin kútip ustaý boiynsha qyzmetterdiń tapsyrys berýshisi, ári oryndaýshysy bolyp keldi.
«Endi MIB tapsyrys berýshi bolady. Bul turǵyndardyń ózderi basqarýshylarmen jáne servistik uiymdarmen, kommýnaldyq qyzmettermen sharttardy tańdap, jasasatynyn, olardyń jumysyn tekserip, oryndalǵan jumystarǵa óz nysany boiynsha aqy tóleitinin bildiredi», - dedi turǵyn úi saiasaty basqarmasynyń basshysy.
Erjan Seitenov búgingi tańda Almatyda 359 MIB (menshik ieleriniń birlestikteri) tirkelgenin jáne basqarýdyń jańa nysany retinde 367 qarapaiym seriktestik tańdalǵanyn, qala boiynsha barlyǵy basqarýdyń 726 jańa formasy bar ekenin aitty.
Spiker megapolis turǵyndaryn bul máselege bastamashylyq tanytýǵa shaqyrdy, sebebi basqarýdyń jańa júiesinde artyqshylyqtar jeterlik.
«Basqarýdyń jańa nysandary «bir úi – bir birlestik – bir shot» qaǵidaty boiynsha jumys isteidi jáne árbir úidi basqarý boiynsha jeke tásildi qarastyrady, úidi kútip ustaýdy qarjylandyrady, ortaq múliktiń saqtalýyn qamtamasyz etedi, sondai-aq turǵyndarǵa aqshanyń túsýi men onyń jumsalýyn baqylaý múmkindigimen óz úiin ǵana kútip-ustaýǵa qarajat jinaqtaýǵa múmkindik beredi», - deidi ol.
