QR Densaýlyq saqtaý ministri Aleksei Tsoi Pfizer kompaniiasymen kelissózderdiń qalai júrip jatqanyn aityp berdi, dep habarlaidy QazAqparat.
«Pfizer kompaniiasymen kelissózderdiń barlyq protsesi qupiialylyq kelisimi aiasynda jabyq. Onyń kez kelgen kezeńin jurtshylyqqa aita almaimyz. Bir ǵana aitarym, Qazaqstan vaktsinanyń ózine tiimdi jaǵdaida jetkizilýi úshin bar kúsh-jigerin saldy. Kelissózder protsesi júrip jatyr jáne jaqyn arada kelisim bekitemiz dep oilaimyn», - dedi ministr Ortalyq kommýnikatsiialar qyzmetinde ótken brifingte.
Onyń aitýynsha, Qazaqstan óz ustanymyn qorǵai aldy jáne kelisim bekitýge qajetti sharttarǵa qol jetkize aldy.
Sonymen birge, Tsoi «Pfizer vaktsinasynyń jetkizilmei qalýyna kim kináli?» degen suraqqa jaýap berdi.
«Munda kóptegen faktorlar men jaǵdailar bar jáne olardy kópshilikke ashyp aita almaimyz. Biz maquldai almaityn sharttar kelisimge qosylǵan bolatyn. Al qazir ortaq mámilege kele aldyq jáne kelissózder aiaqtalýǵa jaqyn. Munda kim kináli dep suraý artyq, óitkeni bul – kelissózder protsesi. Qazaqstan úshin durys sharttarǵa jetpeiinshe bul kelisimdi bekite almaimyz», - dep túsindirdi Tsoi.
