Soltústik Qazaqstan oblysynda Ulttyq biryńǵai testileýde eń joǵary - 128 ball jinaǵan petropavldyq Dmitrii Annenkov bolashaǵyn matematika ǵylymymen bailanystyrmaq, dep habarlaidy "Ult aqparat".
SQO bilim basqarmasy baspasóz qyzmetiniń málimetinshe, UBT-da oblys boiynsha ázirge eń joǵary ball jinaǵan Dmitrii Annenkov - Petropavl qalalyq birinshi jalpy bilim beretin IT litseiiniń túlegi. Ol test tapsyrýǵa beriletin múmkindiktiń alǵashqysynda 128 ball jinady.
«UBT-ǵa birneshe ai daiyndalym. Túrli nusqalarymen jumys istedim. Biraq UBT kezinde, menińshe, suraqtar qiyndaý boldy. Beiindik pánder retinde men matematika men fizikany tańdaǵan edim. Matematika 11 jyl boiy meniń súiikti pánim boldy», - deidi Dmitrii Annenkov.
Biyl bul oqý ornyn 39 túlek bitirmek. Olardyń birqatary 120 upaidan joǵary nátije kórsetip úlgerdi.
«Biylǵy túlekter úshin oqý jyly ońai bolǵan joq. Alǵashqy eki toqsandy qashyqtan oqydy. Sondyqtan UBT-ǵa daiyndyqty úshinshi toqsannan ǵana bastadyq. Bizdiń oqýshymyz búgingi kúni oblys boiynsha eń joǵary ball alyp otyr, muny maqtanyshpen aitamyz. UBT-nyń aiaqtalýyna áli bir ai ýaqyt bar. Sondyqtan budan da joǵary kórsetkishke áli de qol jetkizemiz dep oilaimyn», - deidi Petropavl qalalyq birinshi jalpy bilim beretin IT litseiiniń direktory Oksana Novikova.
«Altyn belgige» úmitker Dmitrii Annenkov endi mekteptegi emtihandaryna daiyndalmaq.
«UBT-da alǵan upaiym kóńilimnen shyqty. Óitkeni men ózime 120-dan kem almaimyn dep meje qoiǵan edim. Mehanika-matematikalyq fakýltetke, qoldanbaly matematika jáne informatika mamandyǵy boiynsha túspekpin, ǵylym jolyn tańdaýym múmkin», - deidi mektep túlegi.
