Petropavlda demalys kúnderi ekinshi jylý-elektr ortalyǵynda birneshe qazandyq isten shyǵyp, energetikter jylý berý qýatyn azaitýǵa májbúr boldy, dep habarlaidy QazAqparat.
Soltústik Qazaqstan oblysy ákimdigi baspasóz qyzmetiniń málimetinshe, Petropavldaǵy jylý-elektr ortalyǵynda 25 jeltoqsan kúni saǵat 10.40 minýt ketkende eki qazandyq isten shyqqan.
Búgin tańerteńgi jaǵdai boiynsha, kásiporyndaǵy 12 qazandyqtyń altaýy jumys istep tur.
Bireýi qalpyna keltirilip jatsa, úsheýi jóndelýde, rezervte turǵan taǵy eki qazandyqty saǵat 14.00-de iske qosýǵa daiyndap jatyr.
Oblys jylý jáne elektr qýatynan ajyratylǵan joq.
Buǵan deiin «Sevkazenergo» AQ Petropavldaǵy ekinshi jylý-elektr ortalyǵynda apat bolǵandyǵy jaiynda eskertip, páterlerde jylýdyń azaiýy múmkin ekendigin aitqan edi.
Qazandyqtar eskirgendikten qysymǵa shydamai, tesilgen. Apattan kásiporynnyń bir jumysshysy kúiik alyp, aýyr halde aýrýhanaǵa tústi.
«27 jastaǵy er adamnyń denesiniń 40 %-y kúigen. Beti, moiyny, qoldary, beli men aiaqtary ystyq býǵa kúiip qalǵan. Bizge túsken kezde ony travmatolog, terapevt, anesteziolog-reanimatolog qarady. Birden jansaqtaý bólimshesine jatqyzý týraly sheshim qabyldandy. Qazir syrqat qarqyndy terapiiadan ótip jatyr. Esin biledi, ózdiginen demalýda. Jaǵdaiy týraly aitýǵa ruqsat berdi, tiisti em-domdy alyp jatyr», - deidi Petropavl qalalyq kóp salaly aýrýhananyń bas dárigeri Janna Maýytova.
Petropavl 2-JEO-da biyldyqqa tirkelgen bul - osymen ekinshi apat.
