Petropavlda biyl jańa jyl merekesine orai úsh negizgi shyrsha bezendirildi. Olardy ornatýǵa, jalpy muz qalashyqtaryn salýǵa biýdjet qarajaty jumsalǵan joq, dep habarlaidy QazAqparat.
Petropavl qalasy jańa jyl merekesine ásem bezendirildi. Keshe saltanatty túrde basty shyrshanyń shamy jaǵylyp, merekelik dýman ótti.
Jalpy biyl oblys ortalyǵynda úsh negizgi shyrsha quryldy. Olar ortalyq alańda, Petropavl ákimdiginiń aldynda jáne Bereke yqsham aýdanynda ornalasqan.
Petropavl qalalyq ákimdiginiń málimetinshe, jańa jyl merekesine orai shahardy bezendirýge, shyrshalardy quryp, muz qalashyqtaryn salýǵa biyl qazynadan bir tiyn da jumsalǵan joq.
Máselen ortalyq shyrshany ornatyp, ásemdeýmen «Apattyq qyzmet» óndiristik kooperativi ainalysty. Onyń biiktigi 30 metrge jetedi.
Al onyń mańyn jinap, abattandyrýmen «Kommýnhoz» JShS ainalysty. Muz qalashyǵyn salýǵa, ony jaryqpen bezendirýge kásipkerler demeýshilik jasady.
Byltyr qalany ásemdeýge qoldanylǵan jańa jyldyq oiynshyqtardy jónge keltirýge jergilikti kolledjder kómektesti.
Muz qalashyǵy Petropavldyń tórt aýdanynda – ortalyq alańda, qalalyq ákimdik aldyndaǵy alańda, Bereke jáne 20-shy yqsham aýdandarynda salynyp jatyr.
Petropavlda qurylmaly shyrsha biyl tórtinshi ret qoldanylyp jatyr. Ótken jyly da qalany merekege orai bezendirýge biýdjetten qarjy bólingen joq.
