Soltústik Qazaqstan oblysynda Politsiia departamentiniń uiymdastyrýymen qyrkúiek-jeltoqsan aralyǵynda «Ýchaske» jedel-profilaktikalyq sharasy ótti, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, qyrkúiektiń 7-si men jeltoqsannyń 1-i aralyǵynda ótken «Ýchaske» jedel-profilaktikalyq is-sharasy 85 kúnge sozyldy. Osy aralyqta soltústikqazaqstandyq ýchaskelik politsiia inspektorlary óz ákimshilik ýchaskelerindegi úi-úidi aralady. Operatsiia aiasynda ýchaskelik politsiia inspektory ár úide, ár páterde bolyp, turǵyndarmen tanysyp, bailanys ornatty.
Tek Petropavl qalalyq Politsiia basqarmasynyń qyzmetkerleri ǵana «Ýchaske» is-sharasy barysynda kópqabatty úilerdegi 76 900 páterdi jáne 14 279 jeke menshik úidi aralaǵan. Nátijesinde oblys ortalyǵynda 934 zeinetkerdiń jalǵyz turyp jatqandyǵy belgili boldy. Olar alaiaqtar men internet-alaiaqtardan zardap shekpeý úshin tártip saqshylary profilaktikalyq jumystar júrgizildi.
SQO PD bastyǵynyń birinshi orynbasary Qanat Aitbaevtyń aitýynsha, ýchaskelik inspektorlar úshin oblys 289 ýchaskege bólingen, onda 89 myń 800 kópqabatty úi men 12 myń 569 jeke menshik úi ornalastqan.
«Ýchaske» jedel-profilaktikalyq is-sharasy aiasynda 211 myń 500 astam baspana tekserildi. Turǵylyqty jeri boiynsha ishki ister organdarynyń esebindegi 5 myń 664 adam tekserildi, onyń 862-si túzetý mekemelerinen shartty túrde merziminen buryn bosatylǵandar.
Oblys boiynsha ishki ister organdarynda esepte turǵan 7 myń 553 azamattyq qarý iesi de tekserildi. Qarýdy saqtaý erejelerin buzýdyń 101 deregi anyqtalyp, 17 myltyq alyndy.
Jalpy operatsiia ótken 85 kún ishinde SQO-da barlyǵy 11 myń 539 ákimshilik quqyq buzýshylyq anyqtaldy, onyń 2 myńnan astamy alkogoldik ishimdik ishý nemese mas kúide qoǵamdyq oryndarda júrýge qatysty.
«Ýchaske» operatsiiasy jylyna bir ret ótedi. Biyl is-shara aiasynda «tirek» pýnktteriniń mekenjailary, bailanys telefondary, sondai-aq ýchaskelik politsiia inspektorlarynyń sýretteri áleýmettik jelilerdegi oblystyq jáne qalalyq politsiianyń resmi paraqshalarynda jariialandy.
