Foto: instagram.com/sevkazenergo
Petropavl qalasynda jylý elektr ortalyǵynyń tútin murjasy óz osinen bir jaǵyna qarai qisaiyp ketti. Qazirgi kezde barlyq qurylys jumystary shuǵyl toqtatyldy, dep habarlaidy Sputnik Qazaqstan.
Jańa nysan opyrylyp qulaǵan murjanyń ornyna salynyp jatyr. Onyń qisaiyp bara jatqanyn jergilikti turǵyndar baiqap qalǵan. Bul jaǵdai áleýmettik jelide qyzý talqyǵa tústi.
"Soltústikqazenergo" kompaniiasy murjanyń qisaiyp ketkenin rastap otyr.
"8 tamyzda "Soltústikqazenergo" AQ-nyń jańa murjany turǵyzý boiynsha qurylys-montajdaý jumystaryna jaýapty jumysshylar murjanyń jobadaǵy syzyqtyń boiynan aýytqyp ketkenin anyqtady", - deidi kompaniia mamandary.
Merdiger kompaniia - "QazjylýARNAIYQURYLYS" jaýapkershiligi shekteýli seriktestigi. Qazirgi kezde murjany salý jumystary shuǵyl toqtatyldy.
Nysandy tekserý kezinde qubyr syrǵymaly konýstyq qalypta qisaiyp ketkeni anyqtalǵan. Jobalyq uiym esep-qisap jasaýǵa kiristi. Mamandar murjany qai jerden quiýǵa bolatynyn eseptep shyǵarady. Al qurylysshylar konýsty qalypty bólshekteý jumystaryn bastaidy.
"Mamandar murjanyń qai jerge deiin durys quiylǵanyn anyqtaidy. Odan keiin betondy buzyp tastaidy, jańa qalyp jasalady. Tútin murjasynyń qurylysy qysqa ýaqyttyń ishinde qaita bastalady", - dedi kompaniia qyzmetkerleri.
Aita keteri, jańa murjanyń biiktigi 180 metr bolady. Burynǵy nysan 150 metrden aspaǵan. Qulamaǵan taǵy bir murja qajet bolmaidy. Jańa nysan ekeýin de almastyra alady.
Buǵan deiin murjanyń 30 metri salynǵan. Onyń qai jerge deiin buzylatyny ázirshe belgisiz. Biyl temir-beton dińgegi tolyǵymen kóteriledi. Al kelesi jyly 1 tútin murjasy iske qosylady.
Petropavldyń burynǵy murjasy 1961 jyly paidalanýǵa berilgen. Byltyr 20 naýryzda ábden tozyǵy jetken nysan opyrylyp qulady. Tótenshe jaǵdai kezinde 38 jastaǵy áiel qaitys boldy.
